2026 йилнинг биринчи чорагида Ўзбекистонда меҳнат бозори фаоллиги юқори даражада сақланиб қолди. Бу ҳақда Марказий банкнинг меҳнат бозори бўйича шарҳида маълум қилинди.

Март ойида бўш иш ўринлари сони 15,4 мингга етиб, иқтисодиётда ишчи кучига бўлган талаб юқорилигича қолаётганини кўрсатди. Талаб, айниқса, хизматлар, чакана савдо, умумий овқатланиш ҳамда ишлаб чиқариш соҳаларида юқори бўлган.

Қурилишда эса бандлик динамикаси инвестиция цикли ва мавсумий омилларга боғлиқ бўлсада, биринчи чорак давомида мазкур соҳада ҳам ишчи кучига талаб ошган.

Шунингдек, умумий овқатланиш ва ишлаб чиқариш тармоқларида меҳнатга талабнинг сезиларли фаоллашгани кузатилган.

Шу билан бирга, HeadHunter Uzbekistan маълумотларига кўра, 2026 йилнинг биринчи чорагида фаол резюмелар сони 31,5 фоизга ошиб, 636 минг нафарга етган.

Марказий банк резюмелар сонининг вакансияларга нисбатан тезроқ ўсишини меҳнат бозорида рақобат кучайгани, иш ҳақи ўсиш суръатлари эса барқарорлашаётгани билан изоҳлаган.

Бандлик ўсиши хизматлар соҳаси ҳисобига таъминланди. Энг катта ўсиш молиявий ва суғурта, профессионал ҳамда техник хизматлар, шунингдек, маъмурий ва ёрдамчи хизматларда кузатилди.

Қишлоқ хўжалигида бандлик қисқарган бўлса, саноат ва савдо соҳаларида барқарор ўсиш қайд этилди.

Таҳлилга кўра, бандликнинг ўсиши асосан хусусий сектор ҳиссасига тўғри келмоқда. 2025 йилда хусусий секторда бандлик 5,2% га ошиб, умумий бандлик ўсишининг 4,2% бандини таъминлаган. Давлат секторида эса бандлик 2,6% га ўсган.

2025 йил тўртинчи чораги якунларига кўра, Ўзбекистонда ишсизлик даражаси 4,8% ни ташкил этган.