Марказий банк ходимларга иш ҳақини қайси банк картасига олишни мустақил танлаш имконини берадиган янги тизимни ишлаб чиқди. Бу ҳақда Spot хабар берди.

Тизим Taqsim деб номланган. Ҳозирда иш берувчилар амалда ходимларни маълум бир банкни танлашга мажбур қилади: иш ҳақи компания ҳамкорлик қиладиган банк карталарига марказлашган ҳолда ўтказилади ва ходим шу банк мижозига айланишига тўғри келади.

Маълум бўлишича, Taqsim тизимини 30 июнда ишга тушириш режалаштирилган эди. Бироқ тизимнинг техник мураккаблиги сабабли бу кечиктирилган — айрим тижорат банклари у билан интеграциялашувга тайёр бўлмаган.

Мазкур тизим 2025 йил 27 ноябрдаги президент қарори билан берилган топшириқ ижроси доирасида ишлаб чиқилмоқда. Унга кўра, мажбурий мижозлар аудиториясидан воз кечган ҳолда фойдаланувчиларга банк картасини очиш танловини яратиш кўзда тутилган. Бундан мақсад чакана банк ва тўлов хизматлари бозорида рақобатни рағбатлантиришга қаратилган.

Ўтган йил декабрига қадар Марказий банк фуқароларга ўз маошини оладиган банк ёки электрон ҳамён провайдерини мустақил танлаш ҳуқуқини берувчи механизмни ишлаб чиқиши, 2026 йилнинг июнь ойигача эса ўз бошқарувидаги тўлов тизимларида оммавий (тўпламли) тўловлар функциясини жорий этиши керак эди.