Ўзбекистонда йиллик инфляция июнь ойида 6,4% ни ташкил этди, бу ҳақда Миллий статистика қўмитаси ҳисоботида маълум қилинди.

Йиллик инфляция даражаси кўп ойлик пасайиш тенденциясини тўхтатди ва май ойидаги 5,5% лик минимумдан кейин тезлашди. Кўрсаткич ўтган ойга нисбатан дарҳол 0,9 фоиз бандга ошди, бироқ 2025 йил июнь ойига нисбатан нархларнинг ўсиш суръати 2,3 фоиз бандга пасайди (ўша пайтдаги йиллик инфляция — 8,7%).

Миллий статистика қўмитаси энергия тарифлари ўсишининг нархлар динамикасига сезиларли таъсирини қайд этди. Ўсишнинг асосий омили аҳоли учун тарифларнинг оширилиши бўлди: электр энергияси ўртача 9,6% га қимматлашди, бу ойлик инфляцияга 0,22 фоиз бандни, тармоқ гази эса 10,7% га ошиб, 0,16 фоиз бандни қўшди.

Инфляцияга энг катта таъсир июнь ойида кўмир нархларининг эркинлаштирилиши бўлди. Кўмир стратегик товарлар рўйхатидан чиқарилгач, унинг нархи 2,1 баравар ошди, бу эса ой давомида йиғма ИНИни бирданига 0,48 фоиз бандга оширди.

Июнь ойида ойлик инфляция 0,6% ни ташкил этди. Таққослаш учун, 2025 йил июнида -0,2% дефляция кузатилган эди. Йил бошидан буён истеъмол нархлари 3,3% га ошган (ўтган йилнинг шу даврида — 4,2%).

Мева-сабзавот маҳсулотларини ҳисобга олмаганда, ой давомида нархлар ўсишининг йиғма даражаси ўтган йилнинг июнь ойидаги 0,5% га нисбатан 1,5 фоизни ташкил этди. Ушбу кўрсаткичнинг йиллик ўсиши 6,9% бўлди — бу ўтган йилги 10,3% дан сезиларли даражада кам.

Озиқ-овқат маҳсулотлари нархлари июнда мавсумий омил ҳисобига 1,4% га арзонлади, ваҳоланки 2025 йилнинг шу ойида бу кўрсаткич 1,1% ни ташкил этиб, пасайиш суръати бироз пастроқ бўлганди. Йил бошидан буён озиқ-овқат маҳсулотлари 2,4% га (ўтган йили 1,7% га), сўнгги 12 ойда эса 6,3% га (2025 йил июнида 6% га) қимматлашган.

Ноозиқ-овқат товарлари бир ой ичида 2,3% га кўтарилди ва бу ўтган йилги 0,2% лик кўрсаткичга нисбатан кескин ўсишни намоён этди. Йил бошидан буён ушбу тоифадаги товарлар нархи 3,9% га (2025 йилнинг январь июнь ойларида 3,1%) ошди, йиллик ўсиш суръати эса ўтган йилги 7,5% дан 5,9% гача секинлашди.

Июнь ойида пуллик хизматлар 1,8% га қимматлашди (бир йил аввал — 0,8%). Йилнинг биринчи ярмида эса бу кўрсаткич 4,1% ни ташкил этди (ўтган йилнинг шу даврида — 10,7%). Йиллик ҳисобда хизмат кўрсатиш соҳасидаги нархлар 7,1% га ўсди (ўтган йили — 15,8%).

Ҳудудлар кесимида июнь ойида нархлар Хоразм (1,0%) ва Фарғона (0,9%) вилоятларида энг кўп ошган. Қолган ҳудудларда ойлик инфляция 0,3% дан 0,7% гача бўлди.

Йиллик инфляция бўйича бу сафар Самарқанд вилояти 6,8% билан биринчи ўринни эгаллади, ундан кейинги ўринларда Қашқадарё (6,7%) ва Андижон (6,6%) вилоятлари бормоқда. Йиллик нисбатда нархлар Сурхондарё вилоятида энг кам — 5,7% га ошди.