BlackRock Ўзбекистонда газни суюқ ёнилғига айлантириш лойиҳасига сармоя киритишни режалаштирмоқда
Компания сунъий интеллект, маълумотларни қайта ишлаш марказлари ва барқарор авиация ёнилғиси ишлаб чиқариш йўналишларидаги лойиҳаларга ҳам қизиқиш билдирган.
Шавкат Мирзиёев 7 июль куни BlackRock директорлар кенгаши аъзоси ва катта бошқарувчи директори Адебайо Огунлесини қабул қилди.
Учрашувда Ўзбекистон ва BlackRock ўртасидаги стратегик шерикликни, аввало, ёқилғи-энергетика соҳасида янада ривожлантириш масалалари муҳокама қилинди. Томонлар компаниянинг Ўзбекистондаги лойиҳалари фаол амалга оширилаётганини қайд этди.
Давлат раҳбари BlackRock билан ҳамкорликнинг устувор йўналишлари сифатида хусусийлаштириш жараёнларидаги шерикликни кенгайтириш, мамлакат инвестициявий жозибадорлигини ошириш, молия бозорини ривожлантириш, нефть-кимё тармоғидаги лойиҳаларни илгари суриш ҳамда сунъий интеллект технологияларига қўшма инвестициялар киритишни белгилаб берди.
Учрашув якунида Адебайо Огунлеси «Ўзбекистон 24» телеканалига берган интервьюсида музокаралар самарали ўтганини айтди. Унинг таъкидлашича, президент билан ҳар бир учрашувдан сўнг Ўзбекистон тараққиётига янада кўпроқ ҳисса қўшиш истаги ортмоқда.
Огунлеси музокараларда газни суюқ ёқилғига айлантириш лойиҳаси ҳамда Ўзбекистонда халқаро молиявий марказ барпо этиш масаласи ҳам муҳокама қилинганини маълум қилди.
Бундан ташқари, BlackRock сунъий интеллект ва маълумотларни қайта ишлаш марказлари, уларни бошқарувчи компанияларга инвестиция киритиш бўйича истиқболли режалар устида ишламоқда. Компания барқарор авиация ёқилғиси ишлаб чиқариш йўналишини ҳам истиқболли лойиҳалардан бири сифатида кўрмоқда.
«Умуман олганда, Ўзбекистон инвестиция киритиш учун ниҳоятда жозибадор мамлакат. Яқинда ўтказилган Тошкент халқаро инвестиция форумида АҚШнинг 200 дан ортиқ компанияси иштирок этди. Бу президент олиб бораётган ислоҳотлар самарасидир. Ўзбекистоннинг халқаро инвестиция харитасидаги ўрни тобора мустаҳкамланмоқда. Шу боис хорижий инвесторларнинг мамлакатингизга қизиқиши ортиб бормоқда», — деди Адебайо Огунлеси.
Унинг сўзларига кўра, BlackRock Ўзбекистонни Марказий Осиёнинг энг жадал ривожланаётган иқтисодиётларидан бири, минтақага кириш дарвозаси ҳамда Шарқ ва Ғарбни боғловчи муҳим кўприк сифатида баҳолайди. Шунингдек, учрашув давомида президент билан тўрт-бешта муҳим йўналиш бўйича келишувга эришилган.
