2026 йилнинг январь—март ойларида Ўзбекистон ялпи ички маҳсулоти (ЯИМ) ҳажми жорий нархларда 447,9 триллион сўмни ташкил этди. Бу ҳақда Миллий статистика қўмитаси дастлабки маълумотларида келтирилган.

Қайд этилишича, ЯИМ таркибининг асосий қисмини тармоқларнинг ялпи қўшилган қиймати ташкил қилган. Унинг ҳажми 427,5 триллион сўмга етиб, умумий кўрсаткичдаги улуши 95,4 фоизни ташкил этди.

Маҳсулотларга соф солиқлар эса 20,4 триллион сўм ёки ЯИМнинг 4,6 фоизига тенг бўлган.

Тармоқларнинг ялпи қўшилган қиймати таркибида энг катта улуш хизматлар соҳасига тўғри келди. Мазкур соҳада яратилган қўшилган қиймат ҳажми 240,1 триллион сўмни ташкил этиб, умумий ҳажмнинг 56,2 фоизига тенг бўлди.

Кейинги ўринлардан саноат соҳаси жой олди — унинг ҳажми 124,9 триллион сўмни ёки 29,2 фоизни ташкил қилди.

Қишлоқ, ўрмон ва балиқчилик хўжалиги ҳиссасига 36,2 триллион сўм (8,4 фоиз), қурилиш соҳасига эса 26,4 триллион сўм (6,2 фоиз) тўғри келган.