Тошкент вилояти Бўстонлиқ туманида жойлашган «Чорвоқ оромгоҳи» дам олиш маскани аукционга қўйилди. Сотув бўйича маълумотлар E-AUKSION порталига жойлаштирилди.

Маълум қилинишича, инвестиция киритиш миқдори ихтиёрий бўлиб, талабгорларнинг хоҳишига қараб белгиланади. Оромгоҳ 70,35 гектар майдонни эгаллаган. Бино-иншоотлар майдони 51 минг 125,88 квадрат/метрни ташкил этади.

Давлат активларини сотиш икки босқичда ўтказилади. Биринчи босқичда талабгорлар олдиндан малакаланади. Жумладан, савдоларда қатнашиш учун талаб қилинган ҳужжатларнинг тўлиқлиги, закалат пули келиб тушганлиги, давлат активларидан келгусида фойдаланиш йўналишларига қўйилган талабга нисбатан талабгор томонидан таклиф этилган бизнес концепцияси лойиҳасининг мақбул ёки мақбул эмаслиги кўриб чиқилади. Иккинчи босқичда талабгорнинг тижорат таклифлари (сотиб олиш нархи ва тўловни амалга ошириш муддати) ҳамда тўлов қобилияти баҳоланади.

Талабгорлардан келиб тушган таклифларни умумлаштирилган ҳолда кўриб чиқиш ва тегишли қарор қабул қилиш учун давлат мулкини сотишда тендер савдоларини ўтказиш бўйича давлат комиссиясига киритилади ҳамда мазкур комиссия қарорига асосан ғолиб аниқланади. Закалад пули аклиф этилаётган нархнинг камида 5 фоиз миқдорида бўлиши белгиланган.

Аввалроқ «Белдирсой оромгоҳи»даги давлат активини сотишнинг иккинчи босқичи натижалари эълон қилинганди.