Ўзбекистон Буюк Британиянинг Кенгайтирилган GPS тизимига қўшилган илк давлат бўлди
Тизим умумий қиймати 437 млрд фунт стерлингдан ортиқ дунёнинг бешинчи энг йирик иқтисодиёти бозорига кириш имконини беради
Ўзбекистон Буюк Британиянинг Кенгайтирилган преференциялар бош тизимига қўшилган биринчи давлат бўлди. Бу ҳақда Инвестициялар ва ташқи савдо вазирлиги матбуот хизмати Kommers.uz’га хабар берди.
Маълум қилинишича, энди Буюк Британияга олиб кирилаётганда Ўзбекистонда ишлаб чиқарилаётган 7800 дан ортиқ турдаги товарларга импорт божи белгиланмайди.
Шунингдек, кенгайтирилган GPS тизими Ўзбекистонга умумий қиймати 437 миллиард фунт стерлингдан ортиқ дунёнинг бешинчи энг йирик иқтисодиёти ва дунёнинг етакчи халқаро истеъмол ва чакана савдо бозорига кириш имконини беради. Буюк Британия учун эса минтақавий марказ бўлиб хизмат қиладиган ва минтақанинг энг жадал ўсаётган ва ривожланаётган бозорига киришни осонлаштиради ҳамда Ўзбекистоннинг ноёб тўқимачилик, қишлоқ хўжалиги маҳсулотлари ва бошқа турли хил маҳсулотларига йўл очади.
Аввалроқ Буюк Британиянинг AKS Service Group компанияси Тошкентда ваколатхона очиши мумкинлиги хабар қилинганди.
