АҚШ Халқаро тараққиёт агентлиги (USAID) Агробизнесни ривожлантириш лойиҳаси маҳаллий хусусий агробизнес корхоналари ўртасида бизнес ғояларнинг учинчи танловини эълон қилди. Бу ҳақда АҚШнинг Ўзбекистондаги элчихонаси матбуот хизмати хабар берди.

Маълум қилинишича, танловда иштирок этиш учун лойиқ деб топилган корхоналар Агробизнесни ривожлантириш жамғармаси орқали қишлоқ хўжалик маҳсулотларининг қўшимча қийматини ва савдо ҳажмини ошириш, янги иш ўринларини яратиш, янги бозорларга кириб бориш каби йўналишларда қўллаб-қувватланади.

Қайд этилишича, танлов 2021 йилда Агробизнесни ривожлантириш жамғармаси доирасидаги бизнес ғояларнинг учинчиси бўлиб, ўтган иккита танлов натижасида Ўзбекистоннинг барча вилоятларидан 200 дан зиёд ариза келиб тушган. Олинган аризалар орасидан 11 та хусусий агробизнес корхоналари танлаб олинган бўлиб, уларга боғдорчилик, чорвачилик, сутчилик ва агротуризм соҳаларидаги маҳсулотларнинг қўшимча қийматини ошириш учун қиймати 200 миллиондан 500 миллион сўмгача бўлган янги технологиялар тақдим этилади.

Шунингдек, Агробизнесни ривожлантириш жамғармаси қишлоқ хўжалиги йўналишида фаолият юритаётган корхоналарда янги технологияларнинг жорий этилишини қўллаб-қувватлайди ва бу орқали уларнинг ўсишига кўмаклашади. Агросаноат корхоналарини қўллаб-қувватлаш Ўзбекистонга ўз иқтисодиётини диверсификация қилиш, минтақавий ҳамда халқаро савдо ҳажмларини ошириш имконини беради.

Таъкидланишича, USAIDнинг Агробизнесни ривожлантириш лойиҳаси тегишли малака ва имкониятларга эга бўлган агробизнес корхоналари, айниқса, аёллар ва ёшлар раҳбарлигидаги ҳамда аёл ва ёшларни иш билан таъминлаётган корхоналарнинг лойиҳа режаларини кутиб қолади. Аризалар 2022 йил 14 январгача қабул қилинади.

Маълумот ўрнида, USAID Ўзбекистон ҳукумати билан мамлакат иқтисодиётини диверсификациялаш ва минтақавий савдони ошириш, саломатлик учун жиддий хавф-хатарлар, жумладан COVID-19ни бартараф этиш, ҳукуматнинг аҳоли эҳтиёжларига оқилона ёндашиш салоҳиятини ошириш йўлида ҳамкорлик қилади.

Аввалроқ Ўзбекистонда қишлоқ хўжалигини қўллаб-қувватлаш учун 100 миллион доллар ажратилиши хабар қилинганди. Шунингдек, USAID Ўзбекистонга коронавирусга қарши кураш учун 2,5 миллион доллар ажратгани ҳақида хабар берилди.