Владимир Кириенко VK (собиқ Mail.ru Group) компаниясининг янги бош директори этиб тайинланди. Бу ҳақда Forbes хабар берди.

Қайд этилишича, VK директорлар кенгаши Кириенконинг номзодини бир овоздан маъқуллаган, қарор аллақачон кучга кирган.

Маълумот учун, Владимир Кириенко — Россия Президенти маъмурияти раҳбарининг ўринбосари Сергей Кириенконинг ўғли. Бундан ташқари, кичик Кириенко «Ростелеком»нинг биринчи вице-президенти ҳам ҳисобланади. Ноябрь ойида CNews манбаларга таяниб, Кириенко компанияни тарк этиши мумкинлиги ҳақида ёзган эди. Бироқ, унинг ишдан бўшатилиши ҳақида расмий хабар берилганича йўқ.

Кириенко VK’ни 2016 йилдан бери бошқариб келган ва 3 декабрь куни компанияни тез орада тарк этишини маълум қилган Борис Добродеевнинг ўрнини эгаллайди.

Маълумот ўрнида, VK бошқарувини ўзгартириш тўғрисидаги қарор VK’ни назорат қилувчи компания «МФ Технология» АЖ эгалари алмашганидан кўп ўтмай қабул қилинди. «Газпром»га яқин бўлган тузилмалар «МФ Технология»нинг янги эгаларига айланди.

Ноябрь ойида «Сбербанк» «МФ Технология» компаниясидан чиқиши ва ўз улушини «Газпромбанк»га 12,8 миллиард рублга сотишини эълон қилди. Кейинроқ миллиардер Алишер Усмоновнинг USM холдинги «МФ Технология»даги улушини сотишга қарор қилди. Унга «Согаз» суғурта гуруҳи (21,2 фоиз «Газпром»га тегишли) харидор бўлди. Forbes ҳисоб-китобларига кўра, USM ва «Согаз» ўртасидаги битим миқдори 6,65 миллиарддан 16 миллиард рублгача бўлиши мумкин.

Владимир Кириенко Россиядаги Олий иқтисод мактаби (ВШЭ) битирувчиси ҳисобланади. У 2008-2011 йилларда «Нижегородпромстройбанк» директорлар кенгаши раиси, 2011-2016 йилларда «Капитал» МЧЖ директорлар кенгаши раиси бўлган. 2016 йилда у «Ростелеком»нинг катта вице-президентига айланган, 2017 йилдан бери эса компаниянинг биринчи вице-президентидир.