Ўзбекистонда бола парваришлаганлик даврини меҳнат стажига қўшиб ҳисоблаш тартиби белгиланмоқда. Бу ҳақда Олий Мажлис Қонунчилик палатаси матбуот хизмати хабар берди.

Маълум қилинишича, Қонунчилик палатасининг мажлисида «‘Фуқароларнинг давлат пенсия таъминоти тўғрисида’ги Ўзбекистон Республикаси Қонунига ҳамда Ўзбекистон Республикасининг Меҳнат кодексига ўзгартиш ва қўшимчалар киритиш ҳақида»ги қонун лойиҳаси биринчи ўқишда муҳокама қилинган.

Таъкидланишича, қонун лойиҳаси билан боқувчисини йўқотганлик пенсияси тўловларини марҳумнинг қарамоғидаги фарзандларига тўлаш белгиланмоқда. Боқувчисини йўқотганлик пенсияси фарзанд 18 ёшгача, агар умумий ўрта таълим муассасаси, академик лицей ва олий таълим муассасасида ўқиётган бўлса 23 ёшга тўлгунга қадар тўланиши назарда тутилган.

Шунингдек, қонун лойиҳасида ногиронлиги болаликдан бўлган болаларга 18 ёшгача қараган даврини иш стажига қўшиб ҳисоблаш таклиф қилинган. Бундан ташқари, болани парваришлаш вақтининг ҳаммасини жамланганда кўпи билан 6 йиллик даврни иш стажига қўшиб ҳисоблаш белгиланмоқда.

«Ушбу қонун лойиҳаси жуда халқчил ҳужжат ҳисобланади. Болани парваришлаш вақтини стажга қўшишнинг таклиф этилаётгани аёлларимизни қўллаб-қувватлашга хизмат қилади», — деган Қонунчилик палатаси депутати Ўрол Ўрозбоев.

Қайд этилишича, қонун лойиҳаси билан республика ҳудудида карантинли ва инсон учун хавфли бўлган бошқа юқумли касалликлар тарқалиши таҳдиди мавжуд бўлган даврда пенсия олиш ҳуқуқи вужудга келган фуқароларга пенсия уни олиш ҳуқуқи пайдо бўлган санадан тайинлаш таклиф этилмоқда. Ушбу тартиб келтирилган тадбирлар (чекловлар) даврида ёки тугагандан сўнг бир ой ичида пенсия тайинлашни сўраб мурожаат этган тақдирда амалга оширилади.

Қонун лойиҳаси биринчи ўқишда қабул қилинган.

Аввалроқ Ўзбекистонда кам таъминланган оилаларга бола пули тўлаш тартиби ўзгартирилгани хабар қилинганди.