Tesla’нинг рақобатчиси Rivian АҚШда 5 млрд долларлик янги завод қуради
Завод қурилиши 2022 йилнинг ёзида бошланади.
Электромобиль ишлаб чиқарувчи Rivian компанияси Жоржия штатида Иллинойсдаги заводидан 2 баравар кўп ишлаб чиқариш қувватига эга иккинчи заводни қуради. Бу ҳақда TechCrunch хабар берди.
Қайд этилишича, янги завод йилига 400 минг дона электромобиль ҳамда қайта зарядланувчи батареялар ишлаб чиқаради. Завод қурилиши 2022 йилнинг ёзида, ишлаб чиқариш эса 2024 йилда бошланади.
Компания акциядорларга йўллаган мактубида кучли бизнес операциялари, иқтидорли кадрлар йиғиш ва логистика нуқтаи назаридан қулай жойлашуви уйғунлиги туфайли заводни қуриш учун Жорджия штатини танлаганини тушунтирган.
Заводда Rivian электромобилларининг янги авлоди лойиҳалаштирилади ва ишлаб чиқарилади. Ҳозир компания R1T пикапи, R1S йўлтанламас ва етказиб бериш хизмати учун юк машинасини ишлаб чиқармоқда. Rivian компаниясининг 20 фоиздан ортиғига эгалик қилувчи Amazon 100 мингта етказиб бериш хизмати учун юк машинасига буюртма бериб биринчи харидорига айланган.
Аввалроқ Rivian капиталлашув бўйича Volkswagen’ни ортда қолдиргани хабар қилинганди. Шунингдек, компаниянинг R1T пикапи Ford, General Motors ва Hyundai’нинг электромобилларини ортда қолдириб, йил пикапи деб топилганди.
