Афғонистон Россиядан нефть маҳсулотлари ва товарлар импорти эвазига Москвага мамлакатда қазиб олинган фойдали қазилмалар, шунингдек, майиз ва доривор гиёҳларни етказиб беришни таклиф қилиши мумкин. Бу ҳақда саноат ва савдо вазири Нуриддин Азизий «РИА Новости»га берган интервьюсида маълум қилди.

Аввалроқ Азизий Кобулнинг Москва билан йил охиригача 1 миллион тоннага яқин бензин ва 1 миллион тонна дизель ёқилғиси етказиб бериш бўйича келишиб олиш истаги борлигини айтганди.

«Ҳозирги Афғонистон ҳукумати бутун мамлакат ҳудудини назорат қилади, вазият хавфсиз. Энди эса биз Россиядан импорт қилинадиган фойдали қазилмалар, жумладан, Россиядан маҳсулот ва энергия ресурслари эвазига Россияга фойдали қазилмаларимизнинг бир қисмини етказиб бера оламиз», — дейди вазир.

Унинг айтишича, нефть ўрнига Афғонистонда қуритилган мевалар, майиз ва доривор гиёҳлар бор. Азизий Афғонистон тарихан Россияга катта ҳажмдаги майиз етказиб берганини қайд этди.

«Биз Россияга бундай маҳсулотлардан юзлаб тонна етказиб бера оламиз. Мисол учун, доривор ўтларнинг нархи ҳозир жуда юқори ва Россия бундай хом ашёга муҳтож. Биз эса улардан бартер савдосида фойдаланишимиз мумкин. Аллақачон Хитой билан қилганимиздек, Россия заводларига хом ашё етказиб бера оламиз», — дейди у.

Аввалроқ Афғонистоннинг Москвадаги муваққат ишлар вакили Жамол Носир Гарвал муваққат ҳукумат Россия билан газ ва нефть сотиб олиш бўйича ҳамкорликни кенгайтириш ниятида эканини маълум қилганди.