Amazon Visa билан комиссия йиғими бўйича келишмовчилик тугаганини эълон қилди. Бу ҳақда Bloomberg хабар берди.

Маълум қилинишича, Amazon ва Visa тўловлардан олинадиган комиссия миқдори бўйича келишув имзолаган ва шу тариқа 2021 йилнинг ноябрь ойидан бери давом этаётган баҳсга барҳам берган.

Ноябрь ойи охирида Amazon тўлов операторининг юқори комиссия йиғими туфайли Буюк Британияда чиқарилган Visa кредит карталарини тўлов учун қабул қилишни тўхтатиш билан таҳдид қилганди. Комиссия йиғимлари Буюк Британия Европа Иттифоқини тарк этгандан кейин ўсган.

Европада бундай комиссиялар миқдори бўйича қонунчилик чегараси мавжуд бўлиб, 0,3 фоизни ташкил этади. Брекситдан сўнг Amazon томонидан тўланадиган комиссиялар 1,5 фоизгача кўтарилган.

Бундай юқори комиссия тўлашни истамаган Amazon 2022 йил 1 январни сўнгги муддат этиб белгилаб, шундан сўнг Британияда Visa карталари билан ишлашни тўхтатишга мажбур бўлганди. Бироқ, компания кейинчалик бу қарорни Visa билан музокаралар ўтказилгунгача қолдирганини эълон қилган. 17 февралда эса музокаралар муваффақиятли якунланган.

Компаниялар Amazon’нинг Visa картаси билан қилинган ҳар бир харид учун тўлаши керак бўлган комиссия миқдори тўғрисида глобал шартнома тузган. Бунинг натижасида Буюк Британияда комиссия йиғими миқдори камаяди.

Бундан ташқари, келишув доирасида Amazon 2021 йилнинг 1 ноябрида Сингапур ва Австралияда Visa карталари билан тўловларни амалга оширувчи мижозлар учун жорий қилинган 0,5 фоизлик қўшимча тўловдан воз кечишини эълон қилган. Бу билан Amazon ўз мижозларини бошқа тўлов карталарига ўтишга ундашга ва шу орқали Visa’ни жазолашга ҳаракат қилганди.

Аввалроқ Amazon ходимларнинг иш ҳақини 160 минг доллардан 350 минг долларга кўтариши хабар қилинганди. Шунингдек, Visa йирик бозорларда карта тўловлари учун комиссияни пасайтириши ҳақида хабар берилди.