Angren Pipe Plant қувур заводини ҳусусийлаштириш бошланди
Angren Pipe Plant масъулияти чекланган жамияти устав капиталидаги 100 фоиз давлат улушини хусусийлаштириш жараёни бошланди. Давактив агентлиги хусусийлаштириш бўйича профессионал консалтинг компанияси танлаб олиниши юзасидан танлов эълон қилди.
Давлат активларини бошқариш агентлиги Angren Pipe Plant масъулияти чекланган жамияти устав капиталидаги 100,0 фоиз давлат улушини хусусийлаштириш бўйича профессионал консалтинг компанияси танлаб олиниши юзасидан танлов эълон қилди.
Қайд этилишича, барча қизиқиш билдирган талабгорлардан таклиф тақдим этиш учун сўровномага асосан тижорат таклифларини 2022 йил 6 сентябрь куни соат 18:00 (Тошкент вақти билан)га қадар тақдим этиши керак.
Актив тўғрисида қисқача маълумот
Angren Pipe Plant масъулияти чекланган жамияти Ўзбекистонда турли диаметрли мис қувурлар ишлаб чиқарувчи корхона бўлиб, лойиҳа қуввати йилига 8 минг тоннани ташкил этади.
Aсосий хом ашё Марказий Осиё минтақасидаги энг йирик тоғ-кон ва қайта ишлаш корхоналаридан бири бўлган «Олмалиқ КМК» акциядорлик жамияти томонидан асосий металл таркиби 99,99% (ГОСТ 546) бўлган катодли мис етказиб берилади.
Таъкидланишича, корхона 2021 йил якунига кўра, 606,8 миллиард сўм соф тушум, 167,2 миллиард сўм соф фойда олган. Компаниянинг Марказий офиси Тошкент вилояти, Aнгрен шаҳар, Оҳангарон кўчасида жойлашган. Корхона 2013 йилдан тижорат фаолиятини бошлаган.
Аввалроқ «Фарғонаазот»нинг 99 фоиз акция пакетининг хусусийлаштириш жараёни бошланганди. Хабарга кўра, сотиш жараёни барча манфаатдор томонлар учун очиқ бўлган рақобат муҳити асосида ташкил этилган.
Жараён манфаатдор иштирокчилардан мажбурий бўлмаган (non-binding offers), сўнгра мажбурий бўлган (binding offers) таклифларни олишдан ва бир ёки бир нечта манфаатдор номзодлар билан кейинги музокараларни ўтказишдан иборат бўлади.
«Фарғонаазот» акциядорлик жамияти 1962 йилда ташкил этилган. Корхона Ўзбекистонда минерал азотли ўғитлар, дефолиантлар ва целлюлоза ацетатлар ишлаб чиқарувчи йирик корхоналардан бири ҳисобланади.