Apple ишдан кетган ходим лавозимини энг паст даражага ўзгартириб қўяди — ОАВ
Компания вакили ушбу амалиёт қўлланишини тан олди.
Apple’нинг собиқ ходимлари компания меҳнат дафтарчалари билан манипуляция қилиши ҳақида сўзлаб берди. Бу ҳақда The Washington Post ёзмоқда.
Қайд этилишича, ходимлар Apple’ни тарк этганда улар орқа сана билан энг паст лавозимга ўтказиб юборилади. Бу эса кейинги бандлик билан боғлиқ муаммоларни келтириб чиқармоқда.
Apple ходим ишдан бўшатилгандан сўнг лавозимни ўзгартираётганига компаниянинг собиқ ходими Шер Скарлетт эътибор қаратган. У АҚШ Қимматли қоғозлар ва биржалар комиссиясига мурожаат қилган. Apple’да дастурий таъминот бўйича муҳандис бўлиб ишлаган ходимлар компанияни тарк этгач «кичик ходим»га айланиб қолган.
Маълум қилинишича, кўпинча, ходимнинг лавозимига Associate сўзи қўшиб қўйилади. Бу эса унинг ёрдамчилигини кўрсатади. Бундай усул лавозимидан қатъи назар компанияни тарк этган барча ходимларга қўлланади.
Apple собиқ ходими Скарлеттнинг сўзларига кўра, бу омил иш топишда қийинчилик уйғотган. Потенциал иш берувчи резюмени текшириш учун жуда узоқ вақт талаб қилиб, охирида барибир иш таклифини қайтариб олган.
Apple вакили Жош Розенстокнинг тушунтиришича, компания ишдан бўшатилгандан кейин ходимнинг лавозимини ўзгартириш амалиётидан фойдаланади. Бироқ Розенсток компания нима учун бундай қилаётганини очиқламаган.
Аввалроқ Apple сунъий интеллект ёрдамида мусиқа ишлаб чиқарадиган стартапни сотиб олгани хабар қилинганди.