Apple Нью-Йоркдаги барча 12 та дўконини коронавирус билан касалланиш ҳолатлари кўпайганлиги сабабли ёпди, деб ёзади Reuters.

«Биз вазиятни мунтазам равишда кузатиб борамиз ва шунга қараб соғлиқни сақлаш чоралари ва дўконларда кўрсатиладиган хизматларни ўзгартирамиз. Биз мижозларимиз ва ходимларимиз саломатлиги ҳақида шундай қайғурамиз», — дейилади Apple баёнотида.

Компания вакилининг сўзларига кўра, ушбу дўконларда харидорлар фақат онлайн буюртмалар олиши мумкин бўлади. Apple, шунингдек, барча мижозлари ва ходимларига дўконларда ниқоб тақишни мажбурий қилган.

Маълумот ўрнида, 2020 йилнинг март ойида коронавирус туфайли компания ўзининг бренд дўконларини икки ҳафтага ёпганди.

Аввалроқ Apple’нинг Ҳиндистондаги заводи iPhone ишлаб чиқаришни тўхтатгани хабар қилинганди. Шунингдек, Apple ходимлари оммавий иш ташлаш қилмоқчилиги ҳақида хабар берилди.