АҚШ Адлия вазирлиги рекорд даражада — 5 млрд долларлик биткоинни мусодара қилди
Криптовалюталар 2016 йилда Bitfinex крипто биржасини бузиб кириш натижасида ўғирланган.
АҚШ Адлия вазирлиги рекорд даражадаги 5 миллиард долларлик биткоинни мусодара қилди. Бу ҳақда BBC хабар берди.
Маълум қилинишича, АҚШ Адлия вазирлиги энг йирик миқдордаги криптовалютани — қиймати 5 миллиард доллар бўлган 120 минг биткоинни мусодара қилган. Bitfinex биржасини бузиш натижасида 2016 йилда биткоинлар ўғирланган эди. Ўшанда улар 71 миллион долларга баҳоланган.
Бош прокурор ёрдамчиси Кеннет Политнинг айтишича, криптовалютанинг мусодара қилиниши АҚШ ҳукумати криптовалюта пул ювиш учун хавфсиз бошпана ёки молия тизимидаги қонунбузарликлар ҳудуди бўлишига йўл қўймаслигининг кучли далилидир.
АҚШ Адлия вазирлиги маълумотларига кўра, номаълум ҳакер 2016 йилда Bitfinex крипто биржасини бузиб, 2000 та ноқонуний транзакцияни амалга оширган. У криптовалютани Нью-Йорклик 34 ёшли Илья Лихтенштейн томонидан бошқариладиган рақамли ҳамёнга ўтказган.
Прокурорлар Лихтенштейн ва унинг рафиқаси 31 ёшли Хезер Морганни пул ювишга уринишда айблаган. Тергов маълумотларига кўра, эр-хотин сўнгги беш йил ичида турли ҳисоблар орқали 25 минг ўғирланган биткоинларни ювган.
Бунинг учун улар сохта идентификаторлардан тортиб биткоинларни бошқа рақамли валюталарга айлантиришгача бўлган изларини яширишнинг турли усулларидан фойдаланган. Терговда Вашингтон, Нью-Йорк, Чикаго ва Ансбах (Германия) терговчилари иштирок этган.
Bitfinex ўз баёнотида криптобиржа тергов билан ҳамкорлик қилганини ва ўғирланган маблағлар қайтарилганидан мамнунлигини айтган. Агар Лихтенштейн ва Морган АҚШни алдаш ва пул ювиш мақсадида фирибгарлик ва тил бириктиришда айбланса, уларнинг ҳар бири 25 йилгача қамоқ жазосига ҳукм қилинади. Активларни мусодара қилиш АҚШ Адлия вазирлиги томонидан тўрт ой аввал тузилган Миллий криптовалютага қарши курашиш жамоаси томонидан амалга оширилган.
Аввалроқ жамоа DarkSide гуруҳи ҳакерларидан 2,3 миллион долларлик криптовалютани тортиб олиш ва шу орқали уларга тўланган тўловни қисман қайтариш орқали рекорд ўрнатган эди. Colonial Pipeline компанияси DarkSide’дан АҚШнинг энг йирик қувур линиясига киберҳужум уюштирганларга 4,4 миллион доллар крипто пул тўлаган. 2021 йил май ойида ҳужум туфайли АҚШнинг шарқий соҳилларига ёқилғи етказиб берилиши вақтинча тўхтатилган.
Аввалроқ Шимолий Корея ҳакерлари 2021 йил 400 миллион долларлик криптовалюта ўғирлагани хабар қилинганди. Шунингдек, Биткоин нархи АҚШ меҳнат бозоридаги вазият яхшиланиши фонида кўтарилгани ҳақида хабар берилди.
