АҚШ Ички хавфсизлик департаментининг Фан ва технологиялар бошқармаси мамлакат жанубий чегарасида тўрт оёқли робот-итлардан фойдаланиш ҳолатини кўриб чиқмоқда.

Қайд этилишича, одамлар ишлаши қийин бўлган ҳудудлар — ҳарорат ҳаддан ташқари иссиқ бўлган тоғлар ва чўлларни патруль қилишда робот-итлар қўлланиши мумкин.

Ушбу роботларнинг вазифаси патруллик қилишдир. Бироқ, ишлаб чиқарувчи компания Ghost Robots аввалроқ уларни SWORD International 6,5 мм учувчисиз махсус мақсадли милтиқ билан жиҳозлаган. Робот-ит ишлаб чиқарувчининг фикрига кўра, 1200 метр масофага юқори аниқлик билан ўқ уза олади.

Роботларни ишга тушириш санаси ҳали аниқ эмас, аммо тунги кўриш мосламалари билан жиҳозланган роботларнинг дала синовлари аллақачон олиб борилмоқда. Улар очиқ жойларда ва турар-жой биноларини акс эттирган сценарийларда патруллик қилиш билан шуғулланмоқда.

Ghost Robots вакилининг қайд этишича, робот-итларни сотиб олиш бўйича сўровлар Хитой ва Россиядан ҳам келиб тушган, бироқ компания ҳамкорлик қилишдан бош тортган.

Аввалроқ футбол учрашувида илк марта робот ҳакам синовдан ўтказилиши мумкинлиги хабар қилинганди.