АҚШ Германиянинг «Шимолий оқим-2» сертификатини тўхтатиш ҳақидаги қарорини қўллаб-қувватлади. Бу ҳақда Оқ уй матбуот котиби Жен Псаки ўз баёнотида маълум қилди.

Псакининг таъкидлашича, Вашингтон Берлин билан биргаликда «Шимолий оқим-2» бошқа олдинга ҳаракатланмаслигини таъминлайди. Унинг сўзларига кўра, АҚШ Германиянинг газ қувурини сертификатлашни тўхтатиб туриш ҳақидаги қарорини Россиянинг Луганск ва Донецкни тан олишига муносабат сифатида қабул қилади.

«АҚШ Президенти агар Россия Украинага бостириб кирса, биз Германия билан ҳамкорликда «Шимолий оқим-2»ни бундан кейин олдинга силжимаслигини таъминлашимиз кераклигини айтди. Кеча биз Германия билан яқиндан маслаҳатлашдик ва уларнинг баёнотини олқишлаймиз», — деган Псаки.

Унинг қайд этишича, 22 февраль куни Германиядан кейин Вашингтон Россияга қарши ўз чораларини эълон қилади. Аввалроқ Германия канцлери Олаф Шольц Германия Иқтисодиёт вазирлигига «Шимолий оқим-2»ни сертификатлаштиришни тўхтатиб туриш топширилганини маълум қилганди. Украина Президенти Владимир Зеленский газ қувурини тўлиқ тўхтатишни сўраган.

«Шимолий оқим-2»ни сертификатлашнинг чўзилгани 2021 йили Европада газ нархининг ошиши ортидаги асосий омиллардан бири бўлганди. Шольцнинг баёнотидан сўнг Европада газ фючерслари 10 фоизга ўсди.

Аввалроқ Германия Россиянинг Луганск ва Донецкни тан олишига жавобан «Шимолий оқим-2» газ қувурини сертификатлашни тўхтатиши хабар қилинди. Шунингдек, Буюк Британия Россия банклари ва бизнесменларига қарши санкциялар киритгани ҳақида хабар берилди.