Автомобиль бозори таҳлили: 2021 йил Ўзбекистонда қандай тенденция кузатилди?
Ишлаб чиқариш камайиб, экспорт ҳажми ошди.
Иқтисодий тадқиқотлар ва ислоҳотлар маркази таҳлиллари шуни кўрсатдики, 2021 йил Ўзбекистон автомобиль бозорида савдо ҳажми 2020 йилга нисбатан 12,5 фоизга ўсди.
Маълум бўлишича, 2021 йилда республика бўйича 691,9 мингта автотранспорт воситалари олди-сотдиси амалга оширилган бўлиб, бу 2020 йилги кўрсаткич — 614,9 мингтага нисбатан 12,5 фоизга кўпдир.
2021 йилда олди-сотди қилинган автотранспорт воситаларининг 28,1 фоизи янги, енгил автомобиллар ҳисобланади. Шундан 13,6 мингтаси ёки 7 фоизи чет элда ишлаб чиқарилган.
Қайд этилишича, коронавирус пандемияси сабабли юзага келган глобал микрочип танқислиги туфайли 2021 йил январь-ноябрь ойлари 12-20 минг дона янги енгил автомобиль етказиб берилган бўлса, декабрь ойига келиб ушбу кўрсаткич 27,2 минггача етган.
Машина олди-сотдиси бўйича ҳудудлар кесимида йиллик энг юқори ўсиш суръатлари Самарқанд (30,9 фоиз), Сурхондарё (29,4 фоиз), Наманган (27,9 фоиз) вилоятлари ва Тошкент шаҳрига (19,9 фоиз) тўғри келган. Навоий (9,7 фоиз), Сирдарё (9,4 фоиз), Тошкент (3,2 фоизга) вилоятларида эса автомобиллар хариди камайган.
Республикада 2021 йил чет элда ишлаб чиқарилган янги, енгил автомобиллар савдоси ошиб борди. Йилнинг биринчи ярмида 4,7 минг дона енгил автомобиллар сотилган бўлса, иккинчи ярим йилликда савдо ҳажми 8,9 мингга (1,9 баробар кўп) етди.
Чет элда ишлаб чиқарилган енгил автомобилларнинг асосий қисми Тошкент шаҳрида (58,4 фоизи) сотилган. Чет элда ишлаб чиқарилган енгил автомобилларнинг сотилиши бўйича кейинги ўринларни Фарғона (12,4 фоиз), Тошкент (7 фоиз) ва Самарқанд (4,7 фоиз) вилоятлари эгаллади. Энг кам олди-сотди операциялари Сурхондарё (0,5 фоиз) ва Сирдарё (0,7 фоиз) вилоятларида кузатилди.
Қайд этиш керакки, Ўзбекистонда 2021 йил 236 минг 667 та енгил автомобиль ишлаб чиқарилган. Бу 2020 йилги кўрсаткич — 280 минг 080 донага қараганда 43 минг 413 тага камдир.
Шундай бўлса-да, мамлакатда автомобиль экспорти 2021 йилда ортди. Ўзбекистон хорижга 281,8 миллион долларга тенг бўлган 28 минг 952 та автомобиль сотган. Ушбу кўрсаткич 2020 йилга нисбатан солиштирилганда 10 минг 401 тага ошган.
