Байден Украинага ёрдам учун 40 млрд доллар ажратишни маъқуллади. Маблағ нималарга йўналтирилади?
Қонун АҚШ Сенатида кўпчилик овози билан маъқулланди: 86 киши ёқлади, 11 нафари қарши бўлди.
АҚШ Президенти Жо Байден Украинага 40 миллиард долларга яқин ёрдам ажратиш ҳақидаги қонунни имзолади. Бу ҳақда Оқ уй сайтидаги хабарда маълум қилинди.
Қайд этилишича, 19 май куни тегишли қонун АҚШ Сенатида кўпчилик овози билан маъқулланди: 86 киши ёқлади, 11 нафари қарши бўлди.
Bloomberg’нинг ёзишича, қонун АҚШ Мудофаа вазирлигига 19,7 миллиард доллар ажратишни кўзда тутади, шундан 6 миллиард доллари Украинани бевосита қўллаб-қувватлашга, яна 9,05 миллиард доллари Пентагон Украинага етказиб берган қурол-яроғ захираларини тўлдиришга сарфланади.
Бошқа ҳаражатлар қаторида Россиянинг Украинага ҳужумидан жабр кўрган бошқа мамлакатларга 4 миллиард доллар, Украина иқтисодиётини тўғридан-тўғри қўллаб-қувватлашга 8,8 миллиард доллар, АҚШдан Украинага озиқ-овқат ва инсонпарварлик ёрдами учун 5 миллиард доллардан ортиқ маблағ йўналтирилади.
«АҚШнинг Украинага кўмаги Киевга ёрдам бериш истаги билан эмас, балки Вашингтоннинг ‘мамлакатимизни оғир мағлубиятга учратиш, унинг иқтисодий ривожланиши ва дунёдаги сиёсий таъсирини чеклаш’ истаги билан изоҳланади», — деганди Россия хавфсизлик кенгаши раиси ўринбосари Дмитрий Медведев.
Bloomberg 18 май куни ЕИ режаси лойиҳасига таяниб хабар беришича, Европа Иттифоқи россиялик олигархларнинг санкциялар остида музлатилган активларидан Россия ҳужумидан сўнг Украинани тиклаш учун фойдаланиш ҳақида ўйламоқда.
Маълумот учун, Россиянинг Украинага босқини 24 февралдан бери давом этмоқда. АҚШ, Буюк Британия ва Европа Иттифоқи аввалроқ Украинага бир неча ҳарбий-техник ва молиявий ёрдам пакетларини ажратган эди.