Биткоин 41 минг доллардан пастга тушиб, 2021 йилнинг сентябрь ойидан бери энг паст кўрсаткични қайд этди. Бу ҳақда Reuters хабар берди.

Маълум қилинишича, 2021 йилнинг ноябрь ойидан бошлаб, биткоин биринчи марта рекорд даражадаги 69 минг долларга кўтарилганидан бери криптовалюта нархи 40 фоиздан кўпроққа қадрсизланган.

Қайд этилишича, биткоин дунёдаги иккинчи энг йирик криптовалюта майнинги маркази бўлган Қозоғистондаги воқеалар фонида тушиб кетган. Кембриж университети қошидаги Муқобил молия маркази маълумотларига кўра, Қозоғистон 2021 йил августида биткоин қазиб олиш учун сарфланган барча қувватнинг 18 фоиздан ортиғини ташкил қилган.

Маълумотларга кўра, Қозоғистон ҳукумати мамлакатдаги оммавий норозилик намойишлари туфайли интернетни ўчириб қўйган. Бу крипто-фермаларнинг фаолиятига халақит берган, уларнинг аксарияти Хитойда майнинг тақиқланганидан кейин Қозоғистонга кўчиб ўтган эди. Шу сабабли майнерлар катта эҳтимол билан криптовалюта ишлаб чиқариш бўйича дунёдаги энг йирик марказ бўлган АҚШга кўчиб ўтади.

Бундан ташқари, крипто-майнерларнинг Қозоғистондан чиқиб кетишига республикада токенларни қазиб олишга тўсқинлик қилувчи янги қоидалар ҳам ёрдам бермоқда. Улар орасида 2022 йилдан бошлаб крипто-ишлаб топувчилар учун қўшимча солиқлар тўғрисидаги қонун ҳам бор.

Шунингдек, биткоин нархига 4 январь куни эълон қилинган Америка марказий банки раҳбариятининг қаттиқроқ пул-кредит сиёсатига мойиллигини кўрсатган АҚШ Федерал захира тизими йиғилишининг баённомаси таъсир қилган бўлиши мумкин.

«Биз барча бозорларда хавф-хатар ҳисси умумий пасайганини кўряпмиз — инфляция билан боғлиқ хавотирлар ва ставкаларнинг ошиши чайқовчиларнинг диққат марказида», — деган Сингапурда жойлашган Stack Funds криптовалюта платформасининг бош директори Мэтью Дибб агентликка берган интервьюсида.

Аввалроқ Tahinis ресторанлар тармоғи биткоин сабаб 5 баравар кўп фойда кўргани хабар қилинганди. Шунингдек, Илон Маск биткоиннинг эҳтимолий асосчиси ким эканини айтгани ҳақида хабар берилди.