«Биз ўзимиздан ўзимиз олдинга ўтиб кетдик» — Фируз Аллаев Ўзбекистонда онлайн савдо қай даражада ривожлангани ҳақида
Фируз Аллаев Ўзбекистондаги онлайн савдо ривожини бошқа давлатлар билан солиштирган
Ўзбекистонга онлайн савдо кеч бўлса ҳам кириб келганини ютуқ, деб билиш керакми ёки бошқа давлатлардан ортда қолиш? Ушбу саволга Asaxiy интернет дўкони асосчиси Фируз Аллаев Kommers.uz’нинг «Карьера» лойиҳаси доирасида қилинган суҳбатда батафсил жавоб берди.
«Уч йил олдинги интернет дўконлар хизматининг сифати, логистикаси, дастурий таъминотини бугунгиси билан солиштириб бўлмайди. Бугун анча олдинга ўтиб кетдик. Лекин борича айтайлик. Биз олдинга фақат ўзимиздан ўзимиз ўтиб кетдик», — дейди тадбиркор.
У, шунингдек, Ўзбекистондаги онлайн савдо ривожини бошқа давлатлар билан ҳам солиштириб кўрди.
«Масалан, яқин Россия ёки қўшни Қозоғистон билан солиштирадиган бўлсак, биз бу соҳада анча орқадамиз»,— дейди у.
Тадбиркорнинг сўзларига кўра, Ўзбекистонда 2020 йил ҳолатига кўра, умумий савдонинг 0,7 фоизи интернет орқали амалга оширилган.
«Билишимча, умумий савдонинг фақатгина 0,7 фоизи интернет орқали ўтади. Бу 2020 йилги статистика эди. Балки, 2021 йилда бироз ўзгариш бўлиб, 1 фоизга чиққандир. Бу олдимизда босиб ўтишимиз, ривожлантиришимиз керак бўлган катта йўл бор, дегани. Ишончим комилки, биз йўлнинг бошидамиз», — дейди у.
Аввалроқ Фируз Аллаев «хориждан гигант рақобатчиларнинг Ўзбекистон бозорига кириб келиши Asaxiy интернет дўкони асосчисини чўчитадими?», деган саволга жавоб бергани хабар қилинганди.
