2021 йилда нашр этилган бизнес китоблари орасида йирик компаниялар ва уларнинг асосчилари ҳақидаги ҳикоялар, ўтган йиллардаги бестселлер китобларнинг муаллифларидан янгиликлар ва экологик муаммолар билан курашиш бўйича қўлланмалар мавжуд.

Forbes тадбиркорлар ўқиши керак бўлган 10 та энг фойдали ва қизиқарли китобларни саралади.

1. Сара Фрайер, «Фильтр йўқ. Instagram ҳикояси»

Bloomberg журналисти Сара Фрайернинг китоби Instagram бизнеси қандай ишлашини ичкаридан билмоқчи бўлганлар учун ҳам, инстаблогерларнинг миллионер бўлишига нима ёрдам беришига қизиқувчилар учун ҳам, Instagram атрофимиздаги дунёни қандай ўзгартирганини тушунмоқчи бўлганлар учун ҳам қизиқарли ва фойдали экани ваъда қилинган.

Fortune, The Economist,Financial Times ва McKinsey Сара Фрайернинг китобини «Йилнинг энг яхши бизнес китоби» деб эътироф этди.

2. Уолтер Айзексон, « Invent and Wander. Amazon асосчиси Жефф Безоснинг машҳур мақолалари»

Уолтер Айзексон Стив Джобс ёки Альберт Эйнштейн каби титанларнинг таржимаи ҳоли муаллифи ҳисобланади. Айзексон ушбу китобни ёзиш учун Amazon ва Blue Origin компаниялари асосчиси Жефф Безоснинг 1997-2019 йиллардаги акциядорларига ёзган барча йиллик хабарларини, шунингдек, унинг нутқлари ва интервьюларини ўрганиб чиққан.

Дарҳақиқат, Айзексоннинг китоби Безоснинг ҳали мавжуд бўлмаган китобининг ўзига хос ўрнини босади, миллиардер шубҳасиз, ҳали ҳам ўз фикрлари ва ғояларини бир жилдга тўплашга вақт топа олмаган.

3. Грег Маккеон, «Қийинчиликларсиз. Асосийси осон бўлсин»

«Эссенциализм» бестселлери муаллифи Грег Маккеон яна бир китоб ёзди. Унинг янги китоби ҳам бестселлерга айланди ва The Times газетасининг шахсий ривожланиш бўйича энг яхши китоблари рўйхатига киритилди.

Муаллифнинг таъкидлашича, кераксиз ҳаракатлар кўпинча зарар етказади, стресс замонавий одамнинг асосий душмани, камроқ ва самарали ҳаракат қилиш исталган натижага олиб келиши мумкин.

«Масалан, икки соат ичида мен икки саҳифа ёзаман. Аммо кетма-кет тўрт соат ижод қилсам, фақат уч саҳифа ёза оламан. Умумий натижа ортиб бормаяпти, аксинча камайиб бормоқда», — деб ёзади муаллиф

4. Адам Грант, «Яна ўйлаб кўринг. Жаҳолат ҳақидаги билимнинг кучи»

Қурбақа ҳақидаги ҳикояни эшитган бўлсангиз керак. У агар қайнаб турган сувга ташланса, дарҳол ундан сакраб чиқади. Агар илиқ сувга ташланса ва сувнинг ҳарорати босқичма-босқич ошириб борилса, қурбақа пишиб қолганини сезмай нобуд бўлади. Босқичма-босқич ўзгариб борадиган тенденцияларга тирик мавжудотнинг реакцияси ушбу ҳикоя билан изоҳланади.

Адам Грант эса ўз китобида ушбу фикрга қарши чиқади. Муаллиф ушбу ҳикояда битта муаммо борлиги, бу ҳам бўлса унинг ҳақиқатга тўғри келмаслигини таъкдлайди. Адам Грантнинг сўзларига кўра, одамзод бошқа мавжудотларга қараганда вазият қайси томонга кетаётганини таҳлил қилишга қодир.

5. Даниэль Канеман, Оливье Сибони, Касс Санштейн. «Шовқин. Инсон хулосаларининг номукаммаллиги»

2021 йилда Даниэль Канеманнинг янги китоби нашр этилди. Унинг 2011 йилда ёзилган «Секин ўйланг, тез қарор қилинг» китоби қарорлари жуда қиммат ҳисобланган компания таъсисчиларидан тортиб инвесторларгача кўплаб одамлар учун ҳақиқий йўриқномага айланганди.

Аммо орадан 20 йил ўтди ва дунёда кўплаб ҳодисалар рўй берди. Шу-шу иқтисодий психологнинг айтадиган гаплари пайдо бўлди ва у ушбу китобни ёзди.

Китоб яна инсон онгига хос бўлган хатолар ҳақида, аммо бу сафар — аҳамиятсиз маълумотларнинг кўплиги билан боғлиқ бўлган ахборот шовқини тўғрисида.

Рўйхатнинг давоми эса қуйидагича:

• Марк Рэндолф. «That will never work. Netflix асосчисининг компания ҳақида ҳикояси»
• Билл Гейтс. «Иқлим фалокатидан қандай қутулиш мумкин»
• Уильям Бриджес. «Ўзингни ўзгартириш. Ҳаётдаги ўзгаришларни тушуниш»
• Ривз Видеман. «Орзу учун миллиард»
• Кристин Нефф. «Ўзига раҳм-шафқат. Ўзингизга раҳм-шафқат ва меҳрибонлик кучи ҳақида»

Аввалроқ миллиардер Жефф Безос тавсия қилган 5 та китоб ҳақида батафсил маълумот берилганди.