«Бизнинг асосий мақсадимиз, янги иш ўринларини яратиб, аҳоли даромадларини оширишдан иборат» — Азиз Абдуҳакимов
Бош вазир ўринбосари — туризм ва маданий мерос вазири Азиз Абдуҳакимов айтишича, Ўзбекистонга ташриф буюрувчиларнинг оқимини 7 млнга, маҳаллий сайёҳлар сони эса 12 млн нафарга етказиш вазифаси қўйилган
Тошкент шаҳрининг «Ўзэкспомарказ» 3-павильонида 30 ноябрь — 2 декабрь кунлари Craft Fair Uzbekistan халқаро ҳунармандчилик маҳсулотлари ва технологиялари ярмаркаси ўтказилади.
Бош вазир ўринбосари — туризм ва маданий мерос вазири Азиз Абдуҳакимов очилиш маросимида ҳозирги кунда республикамиз вилоятларининг ўз имкониятлари ҳам ортиб бораётганини алоҳида қайд этилган.
«Олдимизга жуда катта марраларни қўйганмиз. Ҳар бир ҳудудда биз янгилик яратишга ҳаракат қиляпмиз. Бугунги ярмаркамизда ҳам ҳар бир вилоят ўзининг афзалликлари, имкониятларини тарғибот қилмоқда. Аввалари Тошкентда вазирлик бу иш билан шуғулланарди. Ҳозирда эса ҳудудлардаги мутахассисларнинг ҳам савияси юксалиб, ўзлари халқаро даражада ишламоқда, тўғридан-тўғри шартномага эга бўлмоқда. Биз албатта ҳар бир ҳудуднинг потенциалини етказишда ёрдам берамиз, лекин шуни таъкидлаш лозимки, вилоятлар ҳам мустақил равишда улкан ишларни амалга оширмоқда. Президентимиз қўйган марралари — кейинги йил биз камида 7 миллион хорижий ва 12 миллион маҳаллий сайёҳлар оқимига эришишимиз керак. Бугунги тадбир ҳам, албатта, ўз ҳиссасини қўшади деб ўйлайман. Шунингдек, биз бир йил давомида Қўқон шаҳрини туркий давлатлар орасида тарғибот қилишга ҳаракат қилдик. Бунинг натижасида кўплаб меҳмонхоналар, ресторан-кафелар очилмоқда, хизмат кўрсатиш сервислари яхшиланмоқда. Бизнинг асосий мақсадимиз, янги иш ўринларини яратиб, аҳоли даромадларини оширишдан иборат. Шу мақсадда ҳаммамиз биргаликда меҳнат қилмоқдамиз. Кейинги йилларга қўйилган режалар кўп ва буни албатта бажарамиз», — дея таъкидлайди Азиз Абдуҳакимов.
Ярмаркада республиканинг барча ҳудудларидан 150 нафарга яқин маҳаллий, шунингдек, Тожикистон, Қозоғистон, Қирғизистон, Россия, Афғонистон, Покистон, Ҳиндистон каби 10 га яқин хорижий мамлакатларда фаолият олиб бораётган уста-ҳунармандлар иштирок этмоқда.
Ярмаркада каштачилик, кулолчилик, мисгарлик, ёғоч ўймакорлиги, гиламчилик, миллий матолар, миниатюра каби 20 дан ортиқ йўналишда ҳунармандчилик маҳсулотларининг кўргазма савдоси ташкил этилади.