BMW 8 Series оиласининг янгиланган версияларини тақдим этди
Янгиланган автомобиллар бозорга 2022 йилнинг баҳорида чиқади.
BMW 8 Series оиласининг янгиланган версияларини тақдим этди. Бу ҳақда «Коммерсантъ» хабар берди.
BMW компанияси 8 Series моделлар оиласини янгиланган купе 8 Series, кабриолет 8 Series Convertible, 8 Series Gran Coupe — тўрт эшикли купе ва уларнинг супер «зарядланган» М8 Competition тақдимоти билан янгилади.
Кўриниш жиҳатдан янгиланган автомобиллар қайта ишланган бамперлар ва порлаб турган радиатор панжараси, кўк тормоз калиперлари ва салонида 12,3 дюйм экранли мультимедия билан жиҳозланган. Асосий ва қўшимча ускуналар рўйхати кенгайтирилган.
Техник жиҳатдан, рестайлингдан кейин BMW 8 Series ўзгармаган. Модел учун 840i версиядаги 340 от кучига эга 3 литрли турбомотор, 840d версиядаги 320 от кучига эга 3 литрли дизель мотор, M850i версиядаги 530 от кучига эга 4,4 литрли V8 бензинли турбомотор ва M8 Competition учун айни двигателдаги 625 от кучига эга мотор вариантлари мавжуд. Барча моторлар 8 поғонали автомат узатмалар қутиси, орқа ғилдираклар ёки тўлиқ ғилдираклар билан бирлаштирилган.
Янгиланган BMW 8 Series оиласи бозорга 2022 йилнинг баҳорида чиқади.
Аввалроқ BMW сониялар ичида рангини ўзгартирувчи iХ электромобилини тақдим этгани хабар қилинганди. Шунингдек, BMW премиум автомобиль савдоси бўйича Mercedes’дан ўзиб кетганини маълум қилгани ҳақида хабар берилди.
