Бухорода илк бор самолёт парракларини алмаштириш амалиёти ўтказилди
Техник операцияни амалга ошириш учун 7 соат сарфланган
Бухоро шаҳрида 29 октябрь куни биринчи маротаба самолёт парракларини алмаштириш амалиёти ўтказилди. Бу ҳақда Uzbekistan Airways матбуот хизмати хабар берди.
Маълум қилинишича, «Uzbekistan Airways Technics» МЧЖ биринчи маротаба энг замонавий авиалайнерлардан бири Airbus 320NEO ҳаво кемасининг парракларини алмаштириш амалиётини ўтказган. CFMI Leap-1A двигателида парвоз қилувчи авиалайнер Россия авиаташувчиси Smartavia’га маҳсулоти ҳисобланади.
Таъкидланишича, парракларни алмаштириш, жумладан двигателни ишга тушириш ва синовдан ўтказиш ишларига жами 7 соат сарфланган.
Аввалроқ Uzbekistan Airways Киевга қатновлар сонини ошириши ҳақида хабар берилганди. Шунингдек, Uzbekistan airways technics эркин божхона зонаси фаолиятининг тартиби тасдиқлангани хабар қилинди.