Миллиардер Ричард Брэнсоннинг Virgin Galactic космик компанияси акциялари 15 февраль куни қарийб 34 фоизга ўсди ва куннинг энг юқори кўрсаткичи — 10,9 долларни ташкил қилди. Бу ҳақда Forbes ёзмоқда.

Гап шундаки, Virgin Galactic бунга қадар ўз космик кемасида суборбитал парвозлар учун чипталар сотуви бошланганини эълон қилган эди. Айнан ушбу хабар компания акцияларига ижобий таъсир қилган.

Маълум қилинишича, парвозни буюртма қилиш бир киши учун 450 минг долларга тенг, шу жумладан 150 минг доллар олдиндан талаб қилинади. Virgin Galactic чипталар савдосини шу ҳафта, 16 февралдан бошлаб кенг жамоатчиликка очишни режалаштирмоқда.

CNBC маълумотларига кўра, Брэнсон компанияси илгари ўз рейслари учун ҳар бири 200 мингдан 250 мингдолларгача бўлган 600га яқин чипта сотган. Ўтган йилнинг август ойида Virgin суборбитал рейсларга қизиққан мижозларга 450 минг долларга чипталар савдосини очган. Ўша йилнинг ноябрь ойига келиб компания яна 100га яқин чипта сотишга муваффақ бўлди.

Аввалроқ миллиардер Ричард Брэнсон «омикрон» билан касаллангани хабар қилинганди.