Буюк Британиянинг рақобат ва бозорлар бошқармаси (CMA) Meta Platforms Inc. компаниясини GIF хабарлар алмашиш платформаси Giphy’ни харид қилгани сабаб 1,5 миллион фунт стерлинг (2 миллион доллар) миқдорида жаримага тортди. Бу ҳақда Интерфакс хабар берди.

ОАВ хабарларига кўра, 2021 йил охирида CMA Meta компанияси 2020 йил май ойида 400 миллион долларга харид қилган Giphy платформасини сотиши керак деган қарорга келганди. Агентлик экспертлари Meta ва Giphy ўртасидаги келишувни ўрганиб чиқиб, шартнома ижтимоий тармоқлар ўртасидаги рақобатнинг заифлашишига олиб келади деган хулоса берган.

Шунингдек, келишув оқибатида Giphy рақамли реклама бозорида потенциал рақобатчи бўлишни тўхтатгани қўшимча қилинган.

Хабарга кўра, 4 февраль куни CMA Meta регуляторнинг талабларига тўғри риоя қилмагани, хусусан, компаниялар рақобатда давом этаётгани ва операцияларни бирлаштирмаганлигини тасдиқловчи ҳужжатларни тақдим этмагани ҳақида хабар берган.

Ўз навбатида, Meta агентликнинг Giphy’ни сотиш ҳақидаги буйруғи устидан судга апелляция берган, бироқ жаримани тўлашга рози бўлган.

«Биз жаримани тўламоқчимиз, аммо биз CMA АҚШ қонунлари билан ҳимояланган америкалик фуқароларимизнинг ҳуқуқларига таъсир қилувчи қарорлар қабул қилишини муаммо деб биламиз», — дейди компания вакили.

Маълумот учун, ўтган сессия якунида компания акциялари тўртинчи чоракдаги заиф ҳисобот туфайли 26 фоизга тушиб кетди, бу 232,02 миллиард долларга тенгдир.

Аввалроқ Snap ва Meta раҳбарлари келажак ижтимоий тармоқлари TikTok каби бўлишини айтгани хабар қилинганди.