Дунё бўйича компьютер савдоси сўнгги 10 йилда рекорд даражага етди
2021 йилда 348,8 миллион дона шахсий компьютер сотилди.

Дунё бўйича шахсий компьютерлар (ШК) сотуви деярли 10 йил ичида максимал даражага етди ва 2012 йилги рекордни янгилади. Бу ҳақда CNBC манбаларига таяниб ёзмоқда.
Қайд этилишича, 2021 йилда сотилган жами шахсий компьютерлар сони 348,8 миллион донага етган, бу 2020 йилга нисбатан 14,8 фоизга кўпдир. 2012 йилдан кейин шахсий компьютерлар савдоси пасайиб, 2017 йилда энг паст даражага етганди. Бироқ пандемия даврида савдо яна кўтарилиб кетди.

Хабарга кўра, 2021 йилда сотувлар 2017 йилга нисбатан 34 фоизга кўп бўлган. Масофавий ишлаш ва онлайн таълимга ўтиш туфайли шахсий компьютерларга бўлган талаб яна ошган.
Мутахассисларнинг шахсий компьютерлар бозорининг келажакдаги истиқболлари ҳақидаги фикрлари турлича. Улардан баъзилари пандемия тугагач сотувлар суръати барқарор бўлмаслиги ҳақида огоҳлантирмоқда. Масалан, декабрь ойида IDC тадқиқот компанияси бозордаги талаб пандемия пайтида энг юқори чўққисидан ўтганини айтган ва 2022 йилда унинг секинлашишини башорат қилган.
IDC маълумотларига кўра, Lenovo, HP, Dell, Apple, Asus ва Acer 2021 йилда етказиб берилган қурилмалар сони бўйича шахсий компьютерлар бозорида етакчилик қилмоқда.
Аввалроқ дунё бўйича самолёт ишлаб чиқарувчи энг йирик компания номи маълум бўлганди.






