Сўнгги олти ой ичида кибержиноятчилар 1,8 миллионга яқин дебет ва кредит карталари маълумотларини қўлга киритиб, даркнетда сотувга қўйишга муваффақ бўлди. Бу ҳақда The Times Исроилнинг CyberInt компанияси тадқиқотига асосланиб хабар бермоқда.

Маълум қилинишича, сўнгги олти ой ичида сотувга қўйилган маълумотлар орасида Буюк Британия резидентларига тегишли 74,8 мингта карталар мавжуд. Тахминан 485 мингтаси эса АҚШ резидентларига тегишли.

Таъкидланишича, жиноятчилар карта билан операцияларни амалга ошириш учун зарур бўлган барча маълумотларни сотади: картадаги исм, карта рақами, амал қилиш муддати ва CVV рақами.

Маълумотларга кўра, ҳар бир дебет ёки кредит карта учун маълумотларнинг ўртача нархи одатда 10 дан 20 долларгача туради. Аммо фирибгарлар уларни бир вақтнинг ўзида ўнлаб сотади ва кўпинча улар криптовалюталарда тўлов қабул қилади.

Шу билан бирга, пандемия даврида фирибгарлар томонидан ўғирланган маълумотлар миқдори сезиларли даражада ошган. Сабаби одамлар олдингига қараганда кўпроқ онлайн харид билан шуғулланган.

Қайд этилишича, фирибгарлар карта маълумотларини олиш учун бир нечта анъанавий усуллардан фойдаланади. Масалан, улар одамларни электрон почта орқали юборилган зарарли ҳаволаларни босиш учун алдайди ёки матнли хабарларни юборади. Улар ўқилгач, жабрланувчининг компьютерига зарарли дастурлар ўрнатилади, бу эса ҳакерларга тугмалар босилишини кузатиш имконини беради.

Бундан ташқари, ҳакерлар банк сайтларининг хавфсизлик тизимларидаги бўшлиқларни фаол равишда қидиради ёки қонуний бизнес веб-саҳифаларига ўхшаш фирибгар сайтларни яратади.

Аввалроқ Шимолий Корея ҳакерлари 2021 йил 400 миллион долларлик криптовалюта ўғирлагани хабар қилинганди.