Дунё бўйлаб уч кунда 7 мингдан ортиқ рейс бекор қилинди
Кечиктирилган рейслар сони 25 мингдан ортиқ бўлди.
Сўнгги 3 кун ичида дунё бўйлаб 7000 дан ортиқ рейслар бекор қилинди. Бу ҳақда FlightAware маълумотларига таяниб «Коммерсантъ» хабар берди.
Қайд этилишича, 24 декабрь куни яъни Рождество арафасида 2,4 мингга яқин рейс бекор қилинган. Бундан ташқари, 11 минг рейс кечикишлар билан амалга оширилган.
Шунингдек, 25 декабрь куни католикларнинг Рождество байрамида 2856 та рейс бекор қилинган ва 9400 та рейс кечиктирилган.
26 декабрь куни бекор қилинган рейслар сони эса 2 мингдан ошиб кетди. Рейсларнинг 5 мингтаси кечикиш билан амалга оширилди. Шундай қилиб, байрам кунларида жами 7 мингдан ортиқ рейс бекор қилинди, 25 мингдан ортиқ рейс кечиктирилди.
Шу кунларда бекор қилинган рейсларнинг аксарияти Хитой авиакомпанияларига тўғри келди. Шундай қилиб, China Eastern ва Air China шу кунларга режалаштирилган рейсларнинг қарийб 20 фоизини бекор қилди. АҚШ компаниялари кундалик трафикнинг тахминан 10 фоизини бекор қилди. Рейсларнинг бекор қилиниши ёмон об-ҳаво ва «омикрон» штамми тарқалиши билан изоҳланган.
Аввалроқ Россиянинг 5 та авиакомпанияси Ўзбекистонга мунтазам парвозлар учун рухсат олгани хабар қилинганди.