Дунёнинг энг йирик нефть компанияси 50 млрд долларлик акцияларини сотади
Компания улушининг сотилиши тарихдаги энг каттаси бўлиши мумкин.
Дунёнинг энг йирик нефть компанияси Saudi Arabian Oil Co. (Aramco) биржага қўшимча 50 миллиард долларлик акцияларни жойлаштирмоқчи. Бу ҳақда The Wall Street Journal хабар берди.
Ҳисоб-китобларга кўра, сотилаётган акциялар Aramco’нинг 2,5 фоизини ташкил қилади. Компания акцияларни сотишни 2023 йил охири ёки бошида якунлашни кутмоқда. Ҳозирда Aramco вакиллари Ар-Риёд фонд биржасига акцияларни жойлаштириш бўйича музокаралар олиб бормоқда. Бундан ташқари, улар Лондон ва Сингапур биржаларига қўйилиши ҳам мумкин. Таъкидланишича, улушнинг сотилиши тарихдаги энг каттаси бўлиши мумкин.
Айни пайтда Aramco капиталлашуви 1,3 триллион долларни ташкил этади. У Саудия Арабистони бюджетига даромадларнинг 80 фоизини олиб келади. Нашрнинг қайд этишича, бу улушнинг сотилиши қиролликнинг нефтга қарамликдан қутулишга уринаётган иқтисодиётни диверсификация қилиш стратегиясининг бир қисмидир.
Маълумот ўрнида, Aramco нефть қазиб олиш ва нефть захиралари бўйича дунёдаги энг йирик нефть компанияси ҳисобланади. 2019 йил декабрь ойида у дунёдаги энг йирик IPO’ни ўтказганди, унинг давомида у 1,5 фоиз акцияларни жойлаштирган.
Аввалроқ Brent ва Urals маркали нефть нархи 2014 йилдан бери энг юқори даражага кўтарилгани хабар қилинганди. Шунингдек, Миллиардер Абрамовичнинг ўғли Zoltav нефть компаниясидаги улушини 98,9 фоизга етказиши ҳақида хабар берилди.