Электромобиль ва люкс моделлар сотуви Mercedes-Benz даромадини икки бараварга оширди
Компания эътиборини электрокар бизнесини кенгайтириш ва премиум моделларни ривожлантиришга қаратади.
Электромобиль ва люкс моделлар сотуви Mercedes-Benz’га даромадни икки баравар оширишга ёрдам берди. Бу ҳақда Reuters хабар берди.
Маълум қилинишича, Mercedes-Benz Cars & Vans ўзининг тўлиқ йиллик тўғриланган фоизлар ва солиқлар олдидаги даромадини (EBIT) ҳатто сотувлар 5 фоизга пасайган шароитда ҳам икки бараварга — 6,8 миллиард евродан 13,9 миллиард еврогача кўпайтирган.
Қайд этилишича, премиум автомобиллар савдоси даромадни оширишга ёрдам берган. Сабаби люкс моделлар 2021 йилда бир йил аввалгига қараганда 30 фоиз кўпроқ пул олиб келган ва электромобиллар савдоси 64 фоизга ўсган.
«Харажатларни тежаш ва таъминот занжирини бошқаришга эътибор қаратиш билан бирга, учта стратегик устуворлик мавжуд: электр бизнесимизни кенгайтириш, автомобиль дастурий таъминотини ишлаб чиқиш режаларини тезлаштириш ва люкс моделлар бизнесимизни ривожлантириш», — деган компания бош директори Ола Каллениуса.
Mercedes-Benz Group 2022 йилги даромаднинг 2021 йилга нисбатан бир оз ошишини кутмоқда, чунки таъминот занжири муаммолари осонлашади. Бироқ, компаниянинг таъкидлашича, глобал яримўтказгичлар тақчиллиги тугашини тахмин қилишга ҳали эрта.
Аввалроқ Mercedes-Benz EQE электромобилининг янги версиясини тақдим этгани хабар қилинганди. Шунингдек, Mercedes ёнғин хавфи туфайли 800 мингдан ортиқ автомобилини «чақириб олиши» ҳақида хабар берилди.
