EPAM IT компанияси юзлаб ходимларини Россия ва Беларусдан Ўзбекистонга кўчирди — ОАВ
EPAM ҳам Ўзбекистон IT-паркининг резиденти ҳисобланади.
EPAM Systems дастурий таъминот ишлаб чиқарувчиси ўз ходимларини Беларусь ва Россиядан Ўзбекистонга кўчирди. Бу ҳақда Forbes’га икки маҳаллий тадбиркор маълум қилган ва Ўзбекистонга кўчиб келган EPAM ходимларидан бири, шунингдек, у ерда бўлган россиялик инвесторлардан бири ҳам тасдиқлаган.
Таъкидланишича, бу ерда бир неча юз киши ҳақида гап кетмоқда.
«Ўзбекистон бўйича умумий чатда 600 га яқин одам бор, шунинг учун катта эҳтимол билан мингга яқин деса ҳам бўлади», — дейди компания ходимларидан бири.
Маҳаллий тадбиркорлардан бири мамлакатдаги меҳмонхоналар тўла, Россия ва Беларусдан Ўзбекистонга кўчиб келганларнинг 80 фоизи «эпамчилар» эканини айтади.
Республика Президенти Шавкат Мирзиёевнинг 14 апрель куни бўлиб ўтган йиғилишида эълон қилинган маълумотларга кўра, жорий йил бошидан буён Ўзбекистонга 3 мингга яқин хорижлик IT-мутахассиси келган.
EPAM вакили София Одинцова компания ходимларининг Ўзбекистонга кўчирилиши бўйича изоҳ беришга тайёр эмаслигини айтди. Yuz.uz порталига кўра, компаниянинг Ўзбекистондаги филиали 2019 йилда очилган, 2021 йил ўрталарига келиб унда 150 га яқин мутахассис ишлаган. EPAM ҳам Ўзбекистон IT-паркининг резиденти ҳисобланади.
Ҳозир Ўзбекистонда бўлган EPAM ходимларидан бирининг айтишича, компания кўчиришда ҳам молиявий, ҳам самолёт ва уй-жой излашда ёрдам берган. Унга кўра, компания биринчи ойда ходим ва унинг оиласи учун парвоз, турар жой ва кунлик харажатларни тўлаб беради.
Ходимнинг сўзларига кўра, Ўзбекистондан ташқари, ходимларга яна 10 га яқин давлатга кўчириш таклиф қилинмоқда. EPAM ходимларини кўчириш учун машҳур йўналишлар орасида Грузия ва Арманистон ҳам бор.
EPAM ва компаниянинг Россияни тарк этиши тўғрисида
EPAM Россияни тарк этиш қарорини апрель ойининг бошида эълон қилди.
«EPAM Systems Россиядаги фаолиятини тўхтатиш жараёни бошланганини эълон қилади. Бу қарор россиялик мижозларга хизмат кўрсатишни тўхтатиш ҳақидаги олдинги баёнотдан кейин қабул қилинди», дея таъкидлади компания ўша пайтда бу қарорни Россиянинг Украинага босқини билан боғлаб.
Шу билан бирга, ишлаб чиқувчи ўзининг россиялик ходимларини бошқа мамлакатларга кўчиришни аллақачон бошлаганини маълум қилди, аммо қайси давлатлар тўғрисида гап кетаётганига аниқлик киритмади.
EPAM Systems 1993 йилда АҚШда беларуслик тадбиркорлар Аркадий Добкин ва Леонид Лознер томонидан ташкил этилган. Бош қароргоҳи Қўшма Штатларда жойлашган EPAM 40 дан ортиқ мамлакатларда ишлайди.
Компаниянинг Россияда бир нечта ваколатхоналари бор эди. РБК маълумотларига кўра, 2021 йил охирида Россия EPAM’да 6190 киши ишлаган.