ЕТТБ 2022 йилда Ўзбекистонга қарийб 900 млн доллар сармоя киритди
Европа тикланиш ва тараққиёт банки (ЕТТБ) 2022 йилда Ўзбекистондаги 26 та лойиҳага қарийб 900 миллион доллар сармоя киритди. Шу орқали мамлакат уч йилдан буён Марказий Осиёда энг кўп маблағ олувчи мамлакатга айланди
Европа тикланиш ва тараққиёт банки (ЕТТБ) 2022 йилда Ўзбекистондаги 26 та лойиҳага қарийб 900 миллион доллар сармоя киритди. Шу орқали мамлакат уч йилдан буён Марказий Осиёда энг кўп маблағ олувчи мамлакатга айланди, дея хабар берилди банк веб-сайтида.
Маълум қилинишича, сармоялар, асосан, қайта тикланадиган энергетикадан тортиб банк фаолиятига боғлиқ бўлган қатор соҳаларга киритилган.
Хусусан, банк Бухоро вилоятида умумий ўрнатилган қуввати 1 ГВт бўлган иккита шамол электр станциясини қуриш ва ишга туширишга кўмаклашиш учун 520 миллион АҚШ доллари миқдоридаги иккита синдикатлаштирилган кредит ажратди.
Ушбу лойиҳа ЕТТБнинг ўз минтақалари бўйлаб ҳозирги кунга қадар қайта тикланадиган энергия бўйича энг йирик лойиҳасидир.
Шунингдек, банк Навоий вилоятида 500 МВт қувватига эга яшил майдон шамол электр станциясини қуриш ва фойдаланиш учун 74 миллион АҚШ доллари миқдорида молиялаштириш пакетини ташкил қилди.
Бу тўқнашув хавфи остида бўлган қушларни кузатиш ва аниқлаш ҳамда талабга асосан керакли турбиналарни автоматик равишда ўчиришга хизмат қилувчи сунъий интеллектга асосланган тизим бўйича Марказий Осиёдаги биринчи лойиҳа бўлди.
ЕТТБ ва Ўзбекистон Иқтисодий тараққиёт ва камбағалликни қисқартириш вазирлиги биргаликда метан эмиссиялари миллий дастурини ишлаб чиқишга келишиб олди. Бу 2030 йилгача метан эмиссияларини 30 фоизга қисқартириш бўйича Глобал метан келишуви (ГМК) мақсадига эришиш учун асосий режалаштириш воситасига айланади.
Энергетика секторидан ташқари ЕТТБ Хоразм ва Қорақалпоғистонда қаттиқ маиший чиқиндиларни самарали бошқариш учун масъул бўлган ҳудудий коммунал хўжалик корхоналарига 120 миллион АҚШ долларигача узоқ муддатли суверен кредитлар ажратди.
Лойиҳа Ўзбекистоннинг Париж келишувига мувофиқ декарбонизация саъй-ҳаракатларига ҳисса қўшади ва қаттиқ маиший чиқиндиларни бошқариш бўйича миллий стратегиясини қўллаб-қувватлайди.
Молиявий секторда ЕТТБ «Асакабанк», «Ипотека банк», «Ўзбекистон Ташқи иқтисодий фаолият миллий банки» ва «Саноятқурилишбанк» учун 210 миллион АҚШ доллари миқдоридаги янги савдо молиялаштириш лимитларини оширди.
Битим хусусий маҳаллий тадбиркорлик субъектларига, жумладан, кичик ва ўрта бизнес корхоналарига зарур моллар, хизматлар ва ускуналарни импорт қилиш ҳамда ўз маҳсулотларини экспорт қилиш имконини беради.
ЕТТБ томонидан «Ипак Йўли» банкига тақдим этилган 10 миллион АҚШ доллари миқдоридаги молиявий пакет маҳаллий уй хўжаликлари ва кичик ва ўрта корхоналар учун яшил технологиялардан фойдаланишни яхшилайди ва аёллар тадбиркорлигини рағбатлантиради.
ЕТТБ, шунингдек, «TBC Bank»ка 7 миллион АҚШ доллари миқдорида қўшимча сармоя киритди ва Ўзбекистон билан 20 миллион АҚШ доллари миқдоридаги кроссвалюта алмашинувини амалга оширди, бу эса мамлакатга хорижий валютадаги қарзлардан келиб чиқадиган валюта рискини ҳимоя қилувчи деривативлар бозорини ривожлантиришга ёрдам беради.
Банк мамлакатнинг етакчи пиво ишлаб чиқарувчиси UzCarlsberg компанияси фаолиятини қўллаб-қувватлаш учун 14 миллион евро йўналтирди ва бўйлама сув остида пайвандланган қувурлар ишлаб чиқаришни йўлга қўйиш имкониятига эга бўлган Тошкент қувур заводига 15 миллион АҚШ доллари ажратди. «Саноятқурилишбанк» билан биргаликда мамлакатдаги маиший электроника ва маиший техниканинг етакчи чакана сотувчиларидан бири Idea Concept Group компаниясини кенгайтиришни қўллаб-қувватламоқда.
ЕТТБ томонидан бошқариладиган Марказий Осиё учун Экологик реабилитация ҳисоби (ЭРҲ) томонидан тақдим этилган 7 миллион евро миқдоридаги грант пойтахт Тошкентнинг шарқида жойлашган тоғларда жойлашган Янгиобод ва Чоркесарнинг иккита собиқ уран қазиб олиш майдонларида экологик реабилитация ишларини молиялаштиради.
Маълумот учун, 2022 йилда Ўзбекистонда ЕТТБнинг «Кичик бизнес учун маслаҳатлар» дастури доирасида 100 га яқин лойиҳалар ишга туширилди, бу эса дастурга жалб этилган кичик ва ўрта бизнес субъектлари сонини 50 фоизга оширишга имкон берди. Мазкур лойиҳаларнинг ярми тадбиркор аёллар, 40 фоиздан ортиғи қишлоқ ҳудудларидаги тадбиркорлик субъектлари билан ҳамкорликда амалга оширилди.
ЕТТБ бугунги кунга қадар Ўзбекистон иқтисодиётига 128 та лойиҳа доирасида 3,9 миллиард евродан ортиқ сармоя киритди.
