Европада газ нархи тарихий рекорд даражага кўтарилди
Нархнинг ошиши Украинадаги вазият, об-ҳавонинг совиши ва энергия ишлаб чиқаришнинг камайиши билан боғлиқ.
Европада 2 март куни газ нархи тарихий рекордни янгилади. Бу ҳақда Forbes хабар берди.
Маълумотларга кўра, Нидерландиядаги TTF марказида газ нархи ўзининг энг юқори чўққисида апрель ойида етказиб бериш учун 1 мегаватт/соатига 193,95 еврога ёки 1000 куб метр учун 2280,85 долларга этди. Тошкент вақти билан 14:35 да нарх 43,5 фоизга ўсиб, 1 мегаватт/соат учун 174,6 еврони ташкил этди.
Аввалги рекорд 2021 йилнинг 21 декабрида ўрнатилганди. Ўшанда газ нархи 1000 куб метр учун 2138 долларни ташкил этган. TTF’да газнинг февраль ойидаги ўртача нархи 935 доллар даражасида бўлган.
Қайд этилишича, жорий ҳафтада нархларнинг ошишига Россиянинг Украинадаги «махсус ҳарбий операцияси»дан ташқари, Европада ҳароратнинг бироз пасайиши ва қайта тикланадиган манбалардан электр энергиясини ишлаб чиқаришнинг кескин камайгани ҳам таъсир кўрсатган.
Аввалроқ Европа Иттифоқи Россиянинг еттита банкини SWIFT тизимидан узиб қўйгани хабар қилинганди. Шунингдек, Канада биринчи бўлиб Россия нефтидан воз кечгани ҳақида хабар берилди.
