Facebook номи ва логотипини ўзгартирди (фото)
Ребрендингдан сўнг компания нархи 3 фоизга қимматлашди
Американинг Facebook компанияси ўз номини Meta’га ўзгартирди. Бу ҳақда компания асосчиси Марк Цукерберг онлайн тақдимотда маълум қилди.
Шу тариқа, Facebook компания узоқ вақтдан бери нафақат битта ижтимоий тармоқ, балки WhatsApp, Instagram, Oculus ва бошқа активларнинг эгаси эканини намойиш қилмоқчи.
«Бизнинг вазифамиз ҳалигача битта — одамларни бирлаштириш. Иловаларимизнинг брендлари ўзгармайди. Янги ном биз босиб ўтган бутун йўл ва биз қурмоқчи бўлган келажакни акс эттиради. Энди биз шунчаки ижтимоий тармоқ эмас, балки балки бундан ҳам кўпроқ аҳамиятга эга бўлишни хоҳлаймиз», — дея тушунтирди Цукерберг.
ТАСС нашрининг савдо маълумотларига таяниб ёзишича, бундан буёғига Meta деб аталадиган Facebook компанияси номини ўзгартириш ҳақидаги эълондан кейин 3 фоизга қимматлашди.
Аввалроқ Facebook собиқ ходими Фрэнсис Ҳаугеннинг баёнотлари ва компания атрофидаги можаролар ҳақида маълумот берилганди.
