Twitter Россия ва Украинада реклама кўрсатишни тўхтатди, Facebook эса Россия давлат оммавий ахборот воситаларига реклама жойлаштиришни тақиқлади. Бу ҳақда «Inc.» хабар берди.

Маълум қилинишича, Twitter Россия ва Украинадаги барча рекламаларни «реклама хабарлари одамларни ижтимоий тармоқ орқали юбориладиган жамоат хавфсизлигига оид маълумотлардан чалғитмаслиги» учун тўхтатиб қўйган. Facebook ҳам Россия давлат оммавий ахборот воситаларига реклама жойлаштириш ва уларни монетизация қилишни тақиқлаган.

Бундан ташқари, Twitter нотўғри ва ҳақоратли контент тарқалишининг олдини олиш учун тавсия этилган твитларни чеклайди. Facebook киберхавфсизлик бўйича директори Натаниел Глейхернинг айтишича, ижтимоий тармоқ Россия давлат ОАВларига реклама жойлаштириш ва уларни монетизация қилишни тақиқлаган.

«Биз ҳозирда Россия давлат ОАВларига дунёнинг исталган нуқтасидан туриб бизнинг платформамизда реклама жойлаш ва монетизация қилишни тақиқлаймиз. Биз, шунингдек, қўшимча Россия давлат оммавий ахборот воситаларини белгилашда давом этамиз. Бу ўзгаришлар аллақачон амалда жорий этилган ва дам олиш кунлари давом этади», — деб ёзади Глейхер.

Meta вице-президенти Ник Клегга кўра, бундай чоралар Россиянинг Украинага бостириб киришига жавобан кўрилган. У, шунингдек, ёлғон ахборотга қарши курашиш учун экспертлар бирлашмаси тузилишини маълум қилганди.

Бундан ташқари, Россия ҳукумати 25 февраль куни мамлакатда Facebook’ни қисман чеклашини маълум қилди. Бу қарор Facebook’даги Россия ОАВларининг расмий аккаунтларига киритилган чекловлар билан боғлиқлиги таъкидланган.