Фарғонада «Ипотека банк» мансабдорлари катта миқдордаги кредитни талон-торож қилди
«Ипотека банк» Фарғона филиали мансабдорлари гуруҳ бўлиб, жуда кўп миқдордаги кредит маблағларини ўзлаштириш йўли билан талон-торож қилиб, алдов, мансаб ваколатини суиистеъмол қилиш жиноятини содир этилгани аниқланди.
«Ипотека банк» Фарғона филиали мансабдорлари жуда кўп миқдордаги кредит маблағларини ўзлаштириш йўли билан талон-торож қилиб, мансаб ваколатини суиистеъмол қилгани аниқланди. Бу ҳақда «ЎзА» хабар берди.
Дастлабки маълумотларга кўра, мазкур банк вилоят филиали мансабдор шахслари «О.С.И» масъулияти чекланган жамияти раҳбари А.Ю. ва унинг шериклари билан олдиндан тил бириктириб, жиноят содир этган.
Қайд этилишича, Фарғона шаҳрида жойлашган чорвачилик бино-иншоотларини сотиб олиш учун номи келтирилган жамият ҳисоб рақамига кредит маблағлари ҳисобидан 1 миллиард сўм ўтказилган. Лекин бинолар сотиб олинмасдан, 399 миллион сўми аслида кўрсатилмаган техник хизматлар учун масъулияти чекланган жамияти ҳисоб рақамига, шундан 133 миллион сўми жамият раҳбари А. Ю. нинг корпоратив пластик картасига ўтказиб, нақдлаштирилган.
Қолган 266 миллион сўмни эса ўз эҳтиёжлари учун сарфлаб юбориб, жуда кўп миқдордаги кредит маблағларини талон торож қилганлиги аниқланган.
Бундан ташқари, масъулияти чекланган жамият томонидан тўловлар ўз вақтида амалга оширилмаганлиги сабабли суднинг ундирув қарори билан гаров мулки ҳисобланган чорвачилик бино иншоотларига қаратилган. Банк мансабдор шахслари фуқаро И.К га мазкур бино-иншоотларини олиб беришни айтиб, олдиндан 19 минг 900 долларни олиб, омонатга қўймасдан фирибгарлик йўли билан уни қўлга киритган.
Маълум бўлишича, «Ипотека банк» Фарғона вилояти филиали мансабдор шахслари ва «О.С.И» масъулияти чекланган жамияти раҳбари А.Ю ҳамда бошқаларга нисбатан Жиноят кодексининг 167-моддаси (Ўзлаштириш ёки растрата йўли билан талон-торож қилиш) 3-қисми «а» банди, 168-моддаси (Фирибгарлик) 4-қисми «а» банди ва 205-моддаси (ҳокимият ёки мансаб ваколати доирасидан четга чиқиш) 2-қисми «а» банди билан жиноят иши қўзғатилиб, тергов ҳаракатлари бошланган.
Аввалроқ «Халқ банки»нинг Андижон филиали ходимлари 4,6 миллиард сўмни ўзлаштириб юборгани хабар қилинганди. Унга кўра, камомадга йўл қўйган 13 нафар банк ходимларига Жиноят кодексининг 167-моддаси 3-қисми «а» банди (жуда кўп миқдорда ўзлаштириш йўли билан талон-торож қилиш) билан айб эълон қилинган. 11 нафарига эса қамоқ, 2 нафарига гаров эҳтиёт чоралари қўлланилган.