Февраль ойида жаҳон бўйлаб озиқ-овқат нархлари рекорд даражага етди — БМТ
Ҳисоб-китобларга кўра, дунёда буғдой етиштириш ҳажми 790 млн тоннагача кўтарилиши мумкин.
Февраль ойида жаҳон озиқ-овқат нархлари рекорд даражага етди. Бу ҳақда Бирлашган Миллатлар Ташкилоти Озиқ-овқат ва қишлоқ хўжалиги ташкилоти (FАО)нинг ҳисоботида маълум қилинди.
Маълумотларга кўра, февраль ойида жаҳон озиқ-овқат нархлари тарихий рекордга эришди. Ўсимлик мойлари ва сут маҳсулотлари нархи энг кўп ошган.
Энг оммабоп озиқ-овқат маҳсулотларига жаҳон нархларининг ойлик тебранишларини кузатиш имконини берувчи FАО озиқ-овқат нархлари индексининг ўртача қиймати февраль ойида 140,7 пунктни ташкил этди. Бу январь ойига нисбатан 3,9 фоизга ва 2021 йилга нисбатан 24,1 фоизга юқоридир.
«Озиқ-овқат нархлари индекси ой охиридаги нархларнинг ўртача ўзгаришини акс эттиргани сабабли, февраль ойидаги қиймат Украинадаги можародан келиб чиқадиган бозорлар учун оқибатларини фақат қисман ҳисобга олади», дейилади пресс-релизда.
Қайд этилишича, пальма, соя ва кунгабоқар ёғларининг котировкалари ошиши ҳисобига ўсимлик мойи нархлари индексининг қиймати энг кўп ошган (январга нисбатан 8,5 фоизга). Ғарбий Европа ва Океанияда сут етказиб беришнинг пастлиги, шунингдек, барқарор импорт талаби, айниқса, Шимолий Осиё ва Яқин Шарқ мамлакатларида сут маҳсулотлари нархлари индексининг ўртача қиймати январь ойига нисбатан 6,4 фоизга юқори бўлган.
Ем-хашак донларининг котировкалари ўсиши туфайли дон нархи индекси 3 фоизга ошди. Жанубий Америкада экин ўсиши учун ноқулай шароитлар, буғдой нархининг кўтарилиши ва Украинадан маккажўхори етказиб бериш бўйича ноаниқлик туфайли халқаро маккажўхори нархи 5,1 фоизга ошди.
Қора денгиз портларидан етказиб бериш билан боғлиқ ноаниқлик туфайли буғдойнинг жаҳон нархлари 2,1 фоизга ошди. Шу билан бирга, 2021 йилда жаҳонда дон етиштириш ҳажми 2796 миллион тоннани ташкил этади, бу 2021 йилга нисбатан 0,7 фоизга кўпдир. FAO’нинг 2022 йил учун нархлар прогнозига кўра, дунёда буғдой ишлаб чиқариш 790 миллион тоннагача кўтарилиши мумкин.
Гуручнинг халқаро нархлари айрим экспортёрлар валюталарининг АҚШ долларига нисбатан қимматлашиши ҳисобига 1,1 фоизга ошди. Гўшт нархининг ўртача индекси январь ойига нисбатан 1,1 фоизга юқори бўлди. Шакар баҳоси индексининг қиймати асосий экспорт қилувчи мамлакатларда қулай ҳосил прогнозлари фонида 1,9 фоизга камайди.
Аввалроқ Европада газ нархи тарихий рекорд даражага кўтарилгани хабар қилинганди. Шунингдек, Украинадаги ҳарбий амалиётлар фонида алюминий нархи тарихий максимумни янгилагани ҳақида хабар берилди.
