Финляндия БМТТДнинг Ўзбекистондаги ваколатхонаси билан ҳамкорликда Ўзбекистонда қонун устуворлиги соҳасидаги лойиҳани амалга ошириш учун 1,5 миллион доллар ажратди. Бу ҳақда Dunyo ахборот агентлиги хабар берди.

Маълум қилинишича, лойиҳа эркин ҳуқуқий ёрдамни кенгайтириш орқали кам таъминланган фуқаролар учун одил судловдан фойдаланиш имкониятини оширишга, Омбудсман идорасининг заиф гуруҳларнинг инсон ҳуқуқларини ҳимоя қилиш ва рағбатлантириш бўйича марказий ва минтақавий салоҳиятини мустаҳкамлашга, фуқаролик жамиятининг адолат ва инсон ҳуқуқларини ҳурмат қилиш имкониятларини кучайтиришга қаратилиб, 3 йилга мўлжалланган.

Лойиҳага эксперт ёрдами Финляндиянинг собиқ адлия вазири Туйя Бракс бошчилигидаги Хелсинки университети қошидаги Қонун устуворлиги маркази томонидан кўрсатилади. Марказнинг бир гуруҳ экспертлари 2022 йил 23-25 август кунлари Ўзбекистонда бўлган.

Қайд этилишича, қонун устуворлиги Финляндия Ташқи ишлар вазирлигининг 2024 йилгача Марказий Осиё бўйича мамлакат стратегиясида белгиланган ҳамкорликнинг учта асосий йўналишларидан бири бўлиб, барқарор иқтисодий ривожланиш ва табиий ресурсларни бошқаришни такомиллаштириш ҳисобланади.

Ўзбекистон, Қирғизистон ва Тожикистонга стратегия доирасидаги ёрдамнинг умумий миқдори 25 миллион еврони ташкил этади.

Эслатиб ўтамиз, аввалроқ JICA Қорақалпоғистонда тиббий ёрдам сифатини оширишга 7 миллион доллар ажратган эди.