Франция Тошкентдаги қатор объектларга қуёш панеллари ўрнатади
Тошкент шаҳар ҳокими ўринбосарларининг Франциянинг EDF компанияси вакиллари билан учрашувида муқобил энергия манбаларидан фойдаланиш, хусусан, ҳудуддаги қатор объектларга қуёш панелларини ўрнатишга қаратилган лойиҳа доирасидаги ишлар кўриб чиқилган
Тошкент шаҳар ҳокимининг биринчи ўринбосари Ҳотамбек Шакиров, ҳоким ўринбосари Шароф Раҳманов 3 феврал куни EDF департаментининг Марказий Осиё бўйича директори Эммануэл Чевеннемент, EDF’нинг бизнес бўйича катта менежери Анна Шараева ва Ўзбекистондаги бош директори Пьер Пол Антенисенс иштирокида учрашув ўтказилди.
Пойтахт ҳокимлиги матбуот хизматининг хабар беришича, учрашувда муқобил энергия манбаларидан фойдаланиш, хусусан, ҳудуддаги қатор объектларга қуёш панелларини ўрнатишга қаратилган лойиҳа доирасидаги ишлар кўриб чиқилган.
Франция томонининг маълум қилишича, бугунги кунда лойиҳанинг техник, иқтисодий ва ҳуқуқий ҳужжатлари такомилига етказилмоқда. Шу билан бирга ушбу узоқ муддатли, кенг кўламли лойиҳани биргаликда амалга ошириш учун ҳамкорлик қилиши мумкин бўлган компаниялар кўриб чиқилмоқда.
«Учрашув якунида томонлар амалий мулоқотлар давом этишини билдирди», дейилади хабарда.
Аввалроқ Ўзбекистоннинг Гуанчжоудаги бош консулининг Далянь халқаро бизнес уюшмаси раҳбари билан учрашувида қуёш ва шамол энергиясини қайта ишлаш орқали «яшил» энергия ишлаб чиқариш ва уюшма таркибидаги ушбу йўналишда фаолият олиб борувчи компанияларни Ўзбекистонга жалб этиш юзасидан келишувга эришилгани ҳақида хабар берилганди.