АҚШ, Канада ва Европанинг 100 дан ортиқ бадавлат аҳолиси бойлар учун солиқларни оширишни талаб қилди. Бу ҳақда «Ватанпарвар-миллионерлар» ташкилотининг очиқ хатида сўз боради.

Қайд этилишича, ушбу мурожаат 17-21 январь кунлари онлайн режимда бўлиб ўтаётган Давос иқтисодий форуми иштирокчиларига қаратилган. Талабномани имзолаганлар орасида продюсер ҳамда Уолт Диснейнинг меросхўри бўлмиш Абигайл Дисней ва унинг укаси Тим, шунингдек венчур капиталист ва Amazon’нинг дастлабки инвестори Ник Ханауэр бор.

«Кучли демократия пойдевори адолатли солиқ тизимидир. Миллионерлар сифатида биз ҳозирги тизим адолатсиз эканлигини биламиз. Кўпчилигимиз айтишимиз мумкинки, дунё сўнгги икки йил ичида катта азоб-уқубатларни бошдан кечирган бўлса-да, пандемия даврида бизнинг бойлигимиз кўпайди. Аммо озчилигимиз солиқларнинг адолатли улушини тўлаётганимизни айта оламиз», дейилади хатда.

Oxfam хайрия ташкилоти маълумотларига кўра, 2020 йил март ойида коронавирус пандемияси бошланганидан бери дунёнинг энг бой 10 одамининг умумий бойлигини 700 миллиард доллардан 1,5 триллион долларгача ошди. Шу билан бирга, дунё аҳолисининг 99 фоизининг даромадлари пасайиб, 160 миллиондан ортиқ киши қашшоқлик чегарасидан пастга тушди.

Маълумот учун, «Ватанпарвар-миллионерлар» ташкилоти 2021 йилда ҳам бойлар учун солиқларни ошириш талаби билан чиққан эди.

Аввалроқ миллиардер Илон Маск 2021 йил АҚШ тарихида рекорд — 11 миллиард доллардан ортиқ солиқ тўлаши хабар қилинганди.