Яқин соатларда 2022 йилнинг 18 февраль санаси ҳам поёнига етади. Якунланаётган кун Ўзбекистон ва жаҳон ахборот майдонида қайноқ янгиликларга бой бўлди. Kommers.uz уларнинг энг сараларини битта дайжестга тўплади.

Геленжикдан меҳмонхона сотиб олган Абрамович

Россиялик миллиардер Роман Абрамовичнинг Millhouse компанияси таркибига кирувчи «Финэстейт Ко» МЖЧ «Отель-пансионат Кристалл» компаниясининг ягона акционерига айланди.

Қайд этилишича, «Отель-пансионат Кристалл» компанияси худди шу ном остидаги меҳмонага эгалик қилади. Кўчмас мулк Россиянинг Геленжик шаҳрида, Қора денгиз яқинида жойлашган.

Илгари «Отель-пансионат Кристалл» меҳмонхонаси паритет асосида Геленжикнинг собиқ мэри ва Давлат Думасининг собиқ депутати Сергей Озеров ва Валерий Сергеевич Озеровга тегишли эди. Сергей Озеров 1998 йилдан 2007 йилгача шаҳарни бошқарган. У 2007 йил декабрь ойида Давлат Думасига сайланганида мэр лавозимини тарк этган.

Яна 3 та вилоятдаги газ «заправка»лар ишдан тўхтайди

Фарғона водийсидаги АГТКШлар 18 февраль соат 14:00дан 19 февраль соат 06:00 гача фаолиятини тўхтатади.

Қайд этилишича, республика ҳудудида шу кунларда совуқ об-ҳаво кузатилмоқда. Бундай пайтда аҳоли, истеъмолчилар ва ижтимоий соҳа объектлари, стратегик аҳамиятга эга бўлган корхоналарни узлуксиз ва барқарор табиий газ билан таъминлаш бирламчи вазифа саналади.

Вазирлар Маҳкамасининг 2018 йил 12 январдаги 22-сон қарорининг «Табиий газдан фойдаланиш қоидалари», 7-боб 58-банди ҳамда улгуржи ва «Автомобилларга газ тўлдириш компрессор станцияларига табиий газ етказиб бериш тўғрисида» расмийлаштирилган икки томонлама шартнома шартларидан келиб чиқиб, вилоят ҳокимликлари томонидан тасдиқланган жадвалга асосан автомобилларга газ тўлдириш компрессор шохобчаларида чекловлар жорий қилинмоқда.

Хусусан, Фарғона водийсидаги АГТКШлар 18 февраль соат 14:00дан 19 февраль соат 06:00 гача фаолиятини тўхтатади.

Цукербергнинг қулаётган Meta’си

Meta (аввалги Facebook) дунёдаги энг қиммат давлат компаниялари ўнталигидан чиқиб кетди.

Қайд этилишича, Meta айни вақтда 565,4 миллиард долларлик бозор қиймати билан 11-ўринни эгаллаб турибди, бу Хитойнинг 10-ўриндаги Tencent компаниясидан деярли 25 миллиард долларга камдир. Аввалги Facebook ва 8-ўриндаги Nvidia компанияси ўртасида 50 миллион долларлик фарқ бор.

Маълумот ўрнида, собиқ Facebook ушбу рейтингдаги ўзининг энг юқори чўққисига 1 триллион долларлик капиталлашув билан 2021 йилнинг сентябрь ойида чиққан. Ўшанда компания 6-ўринда қайд этилганди.

Бироқ орадан кўп ўтмай компания кучли 10 таликдан тушиб қолди. Катта эҳтимол билан бу Цукерберг бошлаган ребрендинг сиёсати билан боғлиқ. Зеро, 2021 йилда Meta дунёнинг «энг ёмон» компанияси деб топилган.

Тошкентдаги лойиҳалар билан танишган Мирзиёев

Давлат раҳбари маҳаллалар ҳаёти, саноат лойиҳалари билан танишиш мақсадида Тошкент шаҳри Янгиҳаёт туманида бўлиб турибди. Президент дастлаб Almerro group масъулияти чекланган жамиятининг қандолат корхонасини кўздан кечирди.

Умумий қиймати 70 миллиард сўм бўлган ушбу корхона икки босқичдан иборат. Ўтган йили ноябрда биринчи босқичи ишга туширилган. Янги бино қурилиб, Туркиядан замонавий технологиялар келтириб ўрнатилган.

Маълум қилинишича, бугунги кунда корхона йилига 2 минг тоннага яқин қандолат маҳсулотлари тайёрлаш қувватига эга. Бу ерда шоколад, конфет, печенье, вафли каби 95 турдаги маҳсулот ишлаб чиқарилади. 120 киши иш билан таъминланган.

Давлат раҳбари қандолат маҳсулотлари сифатини кўрган.

«Сифати яхши, чет элники билан бемалол рақобатлаша олади. Фақат нархни тушириш бўйича яна имконият бор. Масалан, импорт қилинаётган қўшимчаларни хомашё шаклида олиб, шу ернинг ўзида тайёрлаш йўлга қўйилса, таннархни 10-15 фоиз арзонлаштириш мумкин. Шунда маҳсулотлар яхши сотилиб, қўшимча иш ўринлари очиш имконияти пайдо бўлади», — дейди Шавкат Мирзиёев.

Корхонанинг иккинчи босқичи фойдаланишга топширилганидан сўнг йиллик қувват 10 минг тоннага етади. Маҳсулотларнинг бир қисмини қўшни давлатлар ва Мўғулистонга экспорт қилиш мўлжалланган.

Ўзбекистон Президентининг «Тошкент шаҳрида ‘Янгиҳаёт’ индустриал технопаркини ташкил этиш чора-тадбирлари тўғрисида»ги қарори қабул қилинган. Давлат раҳбари Янгиҳаёт туманига ташрифи чоғида ушбу технопарк қуриладиган майдонида бўлди.

Қайд этилишича, бу мажмуа учун 210 гектар майдон ажратилган. Шундан 150 гектари икки босқичда аукцион савдоларига чиқарилади. Тадбиркорлар сотиб олинган ернинг мулкдори бўлади ва корхоналарни ўзлари қуради.

«Тошкентда ер танқис, келгусида бундай майдонлар топилмайди. Ҳар бир қарич ердан унумли фойдаланиш керак. Шунинг учун корхоналар кўп қаватли қилиб қурилгани маъқул», — деган Президент.

Таъкидланишича, бу ерда жойлаштириладиган корхоналарда 20 минг иш ўрни яратилиши мўлжалланган. Умуман олганда, технопарк ишлаб чиқаришни кенгайтириш, саноат тармоқларига замонавий технологияларни жорий этиш, шу асосда аҳолини иш билан таъминлашга хизмат қилади.

Шу ерда Янгиҳаёт туманидаги корхоналар маҳсулотлари ҳам намойиш этилган.

Шавкат Мирзиёев, шунингдек, Тошкент айланма йўли бўйида «бокс стрит» қуриш лойиҳаси билан танишди.

Қайд этилишича, йўл бўйида ташкил этиладиган бундай мажмуалар дунё тажрибасида бор. Унда кечаю кундуз ишлайдиган савдо, овқатланиш ва маиший хизмат шохобчалари бўлади. Уларни арзон ва тез қуриш мақсадида юк контейнерларидан фойдаланилмоқда. 

Бунинг учун 7 гектар ер ажратилиши режалаштирилган. Объектлар тадбиркорларга электрон-онлайн аукцион орқали сотилади. Уларда 500 дан ортиқ иш ўрни яратилиши мўлжалланган.

Президент Тошкент шаҳрида ҳаракатланаётган электробусни ҳам кўздан кечирди. «Яшил» транспорт тизимини ривожлантириш, метрополитеннинг кейинги босқичлари ва трамвай йўналишини белгилаш бўйича кўрсатмалар берди.

Олтин нархининг ўсиши

Comex биржасида 17 февраль куни олтин нархи 1,4 фоизга ошиб, бир унция учун 1900 долларни ташкил қилди. Бу 2021 йилнинг июнь ойидан бери кузатилган энг юқори кўрсаткичдир. Бу ҳақда MarketWatch хабар берди.

Қайд этилишича, апрель ойидаги олтин фьючерслари 1,4 фоизга ошиб, бир унция учун 1898 долларни ташкил қилган. Comex биржасидаги савдолар давомида эса котировкалар унция учун 1900 доллардан ошган.

Таҳлилчилар олтин нархининг кўтарилишини Россия ва Украина ўртасидаги навбатдаги кескинлик ва қуролли можаро бошланиш хавфи билан изоҳлайди. Бу кескинликнинг ошиши мудофаа активларига, жумладан қимматбаҳо металларга бўлган талабни оширади.