«Германия Россия гази учун евро ёки долларда тўлайди» — Олаф Шольц
Тўловлар Ғарб санкцияларига учрамаган «Газпромбанк»га ўтказилади.
Германия канцлери Олаф Шольц мамлакат газ етказиб бериш учун тўловни евро ёки долларда амалга оширишини маълум қилди. Бу ҳақда Deutsche Welle хабар берди.
Маълум қилинишича, Германия Россиядан газ етказиб бериш учун шартномаларда кўрсатилганидек, евро ёки долларда тўлашда давом этади.
«G7 давлатларининг келишуви ўз кучида қолади», — деди 30 март куни Германия канцлери Олаф Шольц ва Россия Президенти Владимир Путин ўртасида бўлиб ўтган телефон суҳбатидан сўнг Германия ҳукумати матбуот котиби Штеффен Хебештрайт.
Германия ҳукумати вакилининг сўзларига кўра, Путин 1 апрелдан бошлаб Россияда газ етказиб бериш тўловини рублда амалга ошириш кераклиги тўғрисидаги қонун кучга киришини яна бир бор таъкидлади. Бироқ Европа компаниялари учун ҳеч нарса ўзгармайди.
Қайд этилишича, тўловлар фақат еврода амалга оширилади ва одатдагидек, Россиянинг Украинага қарши тажовузкорлиги сабабли жорий этилган санкцияларга тушмаган «Газпромбанк»га ўтказилади. Кейин банк пулни рублга айлантиради.
Хебештрайтнинг сўзларига кўра, Шольц бу тартиб-қоидага рози бўлмаган, фақат бу ҳақда ёзма маълумот сўраган холос.
Кремль матбуот хизмати хабарига кўра, Путин тўловларни рублда ўтказишни «Россия банкининг валюта захиралари халқаро ҳуқуқни бузган ҳолда Европа Иттифоқига аъзо давлатлар томонидан музлатиб қўйилгани» билан асослаган. Шу билан Европа Иттифоқи Россиянинг Украинага қарши урушига ўз муносабатини билдирди. Путин ўтган ҳафтада евро ва доллардаги тўловлар Россия учун энди ҳеч қандай аҳамиятга эга эмаслигини айтганди.
Аввалроқ Германия газ таъминоти узилиб қолган тақдирда фавқулодда эрта огоҳлантириш режимини жорий қилгани ҳақида хабар берилганди. Шунингдек, Путиннинг баёнотидан сўнг Европада газ нархи кескин кўтарилгани хабар қилинди.