Грузия бош вазири «Боржоми» акцияларини давлатга ўтказиш бўйича топшириқ берди
Компания ўзидан чекловларни олиб ташлаш учун Alfa Group улушини давлатга ўтказишни таклиф қилди.
Грузия бош вазири Ираклий Гарибашвили Alfa Group’га тегишли IDS Borjomi International акциялари улушини имкон қадар тезроқ давлатга ўтказиш жараёнини якунлаш бўйича топшириқ берди. Бу ҳақда Грузия ҳукумати матбуот хизмати хабар берди.
«Бош вазир вазирликларга ушбу жараённи тезроқ якунлаш бўйича фаол ишлашни топширди. Қарор ҳукуматнинг навбатдаги йиғилишида эълон қилинади», — дейилади хабарда.
IDS Borjomi International Боржомидаги минерал сув қадоқлаш заводларига эгалик қилади. Аввалроқ компания Боржоми шаҳридаги заводда 29 апрелдан бошлаб «сўнгги салбий воқеалар» туфайли ишида узилишлар бошлангани учун шиша идишларга сув қадоқлашни тўхтатганини маълум қилди.
Компания ўзидан чекловларни олиб ташлаш учун Alfa Group улушини давлатга ўтказишни таклиф қилди. IDS Borjomi International таъкидлашича, бундай чора компанияга мингдан ортиқ одамни ишдан бўшатишнинг олдини олишга имкон беради.
«Агар Грузия ҳукумати IDS Borjomi International [Alfa Group] эгаси бўлган компаниянинг таклифини маъқулласа, IDS Borjomi Georgia заводларда ишлаб чиқариш жараёнини йўлга қўйиши ва иқтисодий фаолиятни тиклаши мумкин», дея таъкидлади компания.
Битим Грузия Иқтисодиёт вазирлиги ва Адлия вазирлиги томонидан маъқулланиши керак, IDS Borjomi International аллақачон иккала идорага тегишли хат юборган. Шу билан бирга, Иқтисодиёт вазирлиги бу масала бир неча кун давомида кўриб чиқилишини таъкидлаган.
Санкциялар таъсири
«Боржоми» бренди 2013 йилдан бери Россиянинг «Альфа гуруҳи»га тегишли бўлиб, унинг таркибига Европа Иттифоқи санкциялари остида қолган «Альфа Банк» ҳам киради.
Март ойи бошида Эстониянинг Delfi портали Rimi, Maxima ва Selver каби маҳаллий чакана савдо тармоқлари «Боржоми»ни пештахталардан олиб ташлашга қарор қилгани, чунки улар бренд санкциялар остида қолган Россия компаниясига тегишли экани ҳақида маълумот берган эди.