Хитойда хорижий активларга эгалик қилувчи шахслар расмий лавозимларга тайинланмайди
Коммунистик партия хориждаги кўчмас мулк ва компаниялар улушларига эгалик қилишни тақиқловчи ички директивани қабул қилди.
Хитой Коммунистик партияси ўзлари ёки қариндошлари орқали хорижда катта бойликларга эга бўлган амалдорларнинг лавозимга кўтарилишини тақиқлайди. Бу ҳақда The Wall Street Journal манбаларга таяниб хабар бермоқда.
Суҳбатдошларнинг нашрга айтишича, партия хориждаги кўчмас мулк ва компаниялар улушларига эгалик қилишни тақиқловчи ички директивани қабул қилган.
Бундан ташқари, мансабдор шахслар, уларнинг турмуш ўртоқлари ва фарзандларига узрли сабаблар (масалан, ўқиш ёки иш) бўлмаса, молия муассасаларида ҳисобварақ очишга рухсат берилмайди.
WSJ манбаларининг қайд этишича, айрим юқори мартабали амалдорларнинг оила аъзолари янги ҳужжат талабларини бажариш учун хориж компанияларидаги улушларини аллақачон сотиб юборган.
«Ҳужжат Си Цзиньпин томонидан Ғарб Хитой расмийлари ва уларнинг яқинларига нисбатан россияликларга санкциялар жорий қилган тақдирда юзага келадиган хавфларни минималлаштириш мақсадида қабул қилинган», деб ёзади WSJ.
Сўнгги йилларда АҚШ Гонконгда фуқаролик эркинликларини бостиришдаги ролини сабаб қилиб, баъзи хитойлик амалдорларга чекловлар (жумладан, активларни музлатиш) киритди.
WSJ маълумотларига кўра, Коммунистик партиянинг амалдаги раиси Хитойнинг ўн йилликлардаги энг нуфузли раҳбари мақомини мустаҳкамлаш учун партия етакчилигини янада ишончли ҳамкорлар билан мустаҳкамлашни режалаштирмоқда.
Янги директива хорижий активларга эга амалдорларни партияга содиқлик ва инсофсизлик учун жавобгарликка тортиш имконини беради.
Апрель ойида АҚШ давлат котиби ўринбосари Венди Шерман Хитой «Россия-Украина урушидан тўғри сабоқ олишига умид билдириб», Ғарб ўзини мустақил деб эълон қилган Тайванга бостириб киришига жавобан худди шундай қаттиқ санкциялар қўйишини таклиф қилган эди.
Хитой ташқи ишлар вазири ўринбосари Ле Юйчэн «Хитой санкциялар таҳдидидан қўрқмаслигини» айтди.