Rivian’га жавоб: Hyundai АҚШда 6,5 млрд долларлик электромобиль заводи қуради
Hyundai’нинг капитал қўйилмалари, жумладан, мустақил етказиб берувчиларнинг 1 млрд доллари Жоржиянинг иқтисодий ривожланишидаги энг йирик келишув бўлди.
Жанубий Кореянинг Hyundai автомобиль ишлаб чиқарувчиси Жоржияда электромобиль ишлаб чиқарувчи завод очишни режалаштираётганини маълум қилди. Худди шу штатда Rivian ҳам ўзининг электромобиль ишлаб чиқарувчилари заводини қуришни бошлашга тайёрланмоқда.
Hyundai компаниясининг Жоржиядаги 6,5 миллиард долларлик заводи штат электромобиль саноатининг йирик минтақавий қувват марказига айланиш мақсадига эришишга ёрдам беради.
«Электр автомобиллари савдоси ошиб бораётгани сабабли, Жоржия ёпиқ аккумулятор-электр экотизимини яратмоқчи», — деди расмийлардан бири.
Таъкидланишича, у ноёб тупроқли металларни қазиб олиш, аккумулятор ва микросхемалар ишлаб чиқариш, шунингдек, автомобиль эҳтиёт қисмлари ишлаб чиқаришни ўз ичига олади.
Hyundai’нинг капитал қўйилмалари, жумладан, мустақил етказиб берувчиларнинг 1 миллиард доллари Жоржиянинг иқтисодий ривожланишидаги энг йирик келишув бўлди.
Hyundai янги заводда 8,1 минг иш ўрни яратишни режалаштирмоқа. Ҳали қурилмаган объектда ишлаб чиқариш 2025 йилда бошланади, завод йилига 300 минг дона автомобиль ишлаб чиқариш имкониятига эга бўлади.
Rivian Жоржияда
Жоржия ишлаб чиқарувчиларни жалб қилиш ҳаракатларида янада «тажовузкор» бўлиб, Rivian’га 2 минг акр майдонда завод қуриш учун штат тарихидаги энг катта — 1,5 миллиард долларлик рағбатлантириш пакетини берди.
Бунинг эвазига Rivian 2028 йил охиригача ўртача йиллик маоши 56 минг доллар бўлган 7500 ишчи ёллашга ваъда берди.
Бироқ лойиҳа маҳаллий аҳоли ўртасида баҳс-мунозараларга сабаб бўлди: улар ерни сақлаш ва солиқлардан фойдаланишдан хавотирда.
Rivian ушбу ёзда заводни қуришни бошлашни ва уни 2024 йил бошида очишни режалаштирмоқда.
Rivian Жоржияла завод қуриши аввалдан хабар қилиниб келинади. 2021 йил охирида ҳам компания Жоржия штатида Иллинойсдаги заводидан 2 баравар кўп ишлаб чиқариш қувватига эга иккинчи заводни қуриши маълум қилинганди.