Илон Маск сўнги ҳафтада энг «камбағаллашган» миллиардерлар рўйхатида биринчи бўлди
Бизнесменнинг бойлиги АҚШ фонд бозоридаги умумий пасайиш фонида камайган.
Илон Маск бойлиги сўнги ҳафтада энг кўп пасайган миллиардерлар рўйхатида биринчи ўринни эгаллади. Бу ҳақда Forbes хабар берди.
Маълум қилинишича, 14 январдан 21 январгача бўлган даврда Tesla бош директори Илон Маскнинг бойлиги 23,9 миллиард долларга камайган. Бизнесмен АҚШ фонд бозоридаги умумий пасайиш шароитида капиталлари энг кўп пасайган миллиардерлар рўйхатида биринчи ўринни эгаллаган.
Маск барибир дунёнинг энг бой одамлари рейтингида етакчиликни сақлаб қолишга муваффақ бўлган. Ўз навбатида Amazon асосчиси Жефф Безос бир ҳафта ичида 19 миллиард доллар йўқотган ва рўйхатда иккинчи ўриндан учинчи ўринга тушиб кетган. Иккинчи ўринни LVMH раҳбари Бернард Арно эгаллаган, унинг бойлиги 4,5 миллиард долларга ошган.
Meta бош директори Марк Цукербергнинг бойлиги 10 миллиард долларга камайган, Google асосчиларидан Ларри Пейж ва Сергей Брин мос равишда 7,5 миллиард ва 7,2 миллиард доллар йўқотган. Oracle асосчиси Ларри Эллисон 7,5 миллиард долларга, Berkshire Hathaway бош директори Уоррен Баффет эса 6,4 миллиард долларга камбағаллашган.
Ҳафтанинг бошқа кўзга кўринган «омадсизлари» орасида Moderna бош директори Стивен Бансель ҳам бор, унинг бойлиги 22 фоизга, 5,2 миллиардга камайган.
Netflix акциялари 21 январь куни компания ўзининг тўртинчи чорак ҳисоботида ўсиб бораётган рақобат унинг ўсишига путур етказаётганини тан олганидан кейин 20 фоиздан кўпроқ тушиб кетган. Шундан сўнг, компания асосчиларидан бири ва раҳбари Рид Хастингснинг бойлиги 1 миллиард долларга тушиб, 4,1 миллиард долларни ташкил қилган.
АҚШ фонд бозори мамлакат федерал захирасининг пул-кредит сиёсатини кучайтириши кутилаётган бир шароитда пасаймоқда. «Альфа-Капитал» бошқарув компаниясининг катта трейдери Владислав Силаев таъкидлашича, инвесторлар федерал захира тизимининг асосий ставкани март ойидаёқ дарҳол 50 базавий пунктга ошириши мумкинлиги ҳақидаги хабарларга жавоб бермоқда.
Аввалроқ Илон Маск россиялик Tesla эгаларининг шикоятига жавоб бергани хабар қилинганди. Шунингдек, Илон Маскнинг бойлиги иккинчи марта 300 млрд доллардан ошгани ҳақида хабар берилди.
